პოლიტიკა

ნინო ბურჯანაძე ირაკლი კობახიძის წინააღმდეგ სარჩელს შეიტანს

პარტია „დემოკრატიული მოძრაობის“ ლიდერი ნინო ბურჯანაძე საქართველოს პარლამენტისა და საკონსტიტუციო კომისიის თავმჯდომარეს, ირაკლი კობახიძეს უჩივის.

ბურჯანაძის თქმით, კობახიძემ ყოველგვარი ახსნა-განმარტების გარეშე ამოშალა საკონსტიტუციო კომისიის სიიდან ოპოზიციური პარტიები, რომლებმაც კომისიას ბოიკოტი განუცხადეს.

„ჩვენ სასამართლოში მივმართავთ სარჩელით ირაკლი კობახიძის წინააღმდეგ, ვინაიდან მან პარლამენტის თავმჯდომარის რანგში მიიღო მართლა უპრეცედენტო გადაწყვეტილება, მართლა სატირალი რომ არ იყოს, სასაცილო გაადწყვეტილება იმასთან დაკავშირებით, რომ საკონსტიტუციო კომისიის დასკვნითი სხდომის წინა დღეს, უჩუმრად ბოიკოტგამოცხაედებული პოლიტიკური პარტიების წარმომადგენლები, ყოველგვარი სამართლიანი საფუძვლის გარეშე ამოეღო კომისიის სიიდან“, - განაცხადა ბურჯანაძემ დღევანდელ ბრიფინგზე.

ბურჯანაძე ქუთაისის საქალაქო სასამართლოში სარჩელის შეტანას გეგმავს.

„ჩვენ მივმართ ქუთაისის საქალაქო სასამართლოს სარჩელით, რომ უხეშად იყო შელახული „დემოკრატიული მოძრაობის“ წარმომადგენლის, დიმიტრი ლორთქიფანიძისა და, შესაბამისად, ჩვენი პარტიის კონსტიტუციური უფლება, რომ ჩვენ შეგნებულად ჩამოგვართვეს უფლება, დაგვეფიქსირებინა ნეგატიური პოზიცია საკონსტიტუციო კომისიის მუშაობაში და უბრალოდ ამოგვშალეს საკონსტიტუციო კომისიიდან, ისევე როგორც დანარჩენი 13 თუ 15 პარტია“, - განაცხადა ბურჯანაძემ.

ანა მებურიშვილი