პოლიტიკა

ოპოზიციის თვითმიზანი იყო საკონსტიტუციო ცვლილებების გარშემო კონსენსუსი არ შემდგარიყო - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, ოპოზიციის თვითმიზანი იყო საკონსტიტუციო ცვლილებების გარშემო კონსენსუსი არ შემდგარიყო.

ამის შესახებ კობახიძემ ქუთაისში, პარლამენტის მიერ ახალმიღებულ კონსტიტუციაში დაგეგმილი ცვლილებების პროექტის საყოველთაო-სახალხო განხილვაზე განაცხადა.

„დოკუმენტის თაობაზე კონსენსუსის მიღწევა ორივე მხარეზეა დამოკიდებული და ცალმხრივი ვერ იქნება. ვენეციის კომისიამ კონსენსუსისკენ ორივე მხარეს მოუწოდა, მაგრამ ოპოზიციის თვითმიზანი იყო, რომ ამ დოკუმენტის გარშემო კონსენსუსის არ შემდგარიყო. გახსოვთ, რომ სახელმწიფო საკონსტიტუციო კომისიაში დოკუმენტი იყო, სადაც პროპორციულ სისტემაზე გადასვლა იყო ასახული და ამ პირობებში ოპოზიციამ კომისია დატოვა. ამ პირობებში კონსენსუსის ჩამოყალიბება შეუძლებელი გახდა. ეს ჩვენზე დამოკიდებული ვერ იქნება, ოპოზიციის ძალისხმევაა საჭირო რომ კონსენსუსი შედგეს, მაგრამ ეს სულისკვეთება ვერ დავინახეთ. საუბარია ე.წ. ბონუსის გაუქმებაზე და ბლოკების დაშვებაზე, რაზეც საყოველთაო თანხმობაა, მაგრამ ამ პროცესში ოპოზიცია არ მონაწილეობს, რასაც საფუძველი არ აქვს, ეს პოლიტიკური პროცესის, პოლიტიკური ორთაბრძოლის ნაწილია. ეს არჩევანი ოპოზიციამ გააკეთა და იმ ცვლილებების მიღება ცალმხრივი პასუხისმგებლობით გვიწევს, რაზეც ვენეციის კომისიასთან შევთანხმდით“,- აღნიშნა კობახიძემ.

მონიკა დავლიანიძე