კომენტარი

პარლამენტში სიცრუის დეტექტორი რომ იყოს გაკეთებული, ალბათ, აფეთქდებოდა - რომან გოცირიძე

ამ სიცრუის მოსმენის შემდეგ, მსოფლიოში ყველაზე დიდი სიცრუის დეტექტორიც კი ვერ გაუძლებდა და აქ ამ სიცრუის ფონზე აფეთქდებოდა, - ამის შესახებ ფრაქცია "ნაციონალური მოძრაობის" თავმჯდომარემ, რომან გოცირიძემ ჟურნალისტებს განუცხადა.

„დღესაც ამ სიცრუითა და ტყუილებით აპირებენ ფონის გასვლას. აქ სიცრუის დექტექტორი რომ იყოს გაკეთებული, ალბათ აფეთქდებოდა. ჩვენ მოვისმინეთ პარლამენტის თავმჯდომარის მოხსენება ერთი წლის მუშაობის შესახებ და უნდოდა წარმოეჩინა ეს მუშაობა წარმატებულად.

პარლამენტის ერთი წლის საქმიანობაში, როგორც სარკეში, აისახება "ქართული ოცნების" მთელი ხელისუფლების წარუმატებლობისა და დანაშაულის სიმბოლო. აქ გასულ წელს იყო შემოთრეული გავრილოვი და მოყვა ამ გავრილოვის ვიზიტს პარლამენტის თავმჯდომარის გაგდება საპროტესტო აქციების ფონზე; ამ დარბაზში იქნა მიღებული ისეთი კანონები, რომელმაც სასამართლო სისტემა დაასამარა; აქ დაამტკიცეს უზენაესი სასამართლოს მოსამართლეები, რომელთა პირველი რეპრესიული შედეგი იწვნია ოპოზიციამ გიგი უგულავას დაკავების სახით; ამ დარბაზიდან გამოიყვანეს ნიკა მელია; ამ დარბაზში დაინგრა უმრავლესობა. ამ სიცრუის მოსმენის შემდეგ, მსოფლიოში ყველაზე დიდი სიცრუის დეტექტორიც კი ვერ გაუძლებდა და აქ, ამ სიცრუის ფონზე აფეთქდებოდა", - განაცხადა რომან გოცირიძემ.