პოლიტიკა

,,პატრიოტთა ალიანსი” მთავრობის ოპტიმიზაციის შესახებ კანონპროექტების კენჭისყრაში მონაწილეობას არ მიიღებს

,,პატრიოტთა ალიანსი” მთავრობის ოპტიმიზაციის შესახებ კანონპროექტების კენჭისყრაში მონაწილეობას არ მიიღებს.

შესაბამისი განცხადება პარლამენტის რიგგარეშე სხდომაზე სიტყვით გამოსვლისას ფრაქცია ,,საქართველოს პატრიოტების“ წევრმა, ადა მარშანიამ გააკეთა.

დეპუტატმა აქვე, საქართველოს პრემიერ-მინისტრ, გიორგი კვირიკაშვილს თანამდებობიდან გადადგომისკენ მოუწოდა.

”ყველამ ერთად, ამ ქვეყნის შვილებმა უნდა დავიწყოთ პროტესტი. ეს ჩვენი სამშობლოა, ჩვენი ქვეყანა. ჩვენ უნდა მივხედოთ ჩვენ თავს. სამი წელი კი არ უნდა ველოდოთ და უსაქმური მთავრობა დროზე უნდა გავუშვათ. მე საერთოდ არ მიკვირს, რომ პრემიერ-მინისტრი არ მოვიდა აქ. ეს არის პატარა დეტალი, რატომაც უნდა გადადგეს ბატონი კვირიკაშვილი. ინამუსოს, გადადგეს და დაუბრუნდეს თავის ბანკს. არ არის ეს ადამიანი იმ დონის და ბიოგრაფიის, რომ ქვეყნის პრემიერ-მინისტრი იყოს. ეს არის ჩვენი პოზიცია. შესაბამისად, ჩვენ მონაწილეობას არ ვიღებთ არც კენჭისყრაში”, - განაცხადა ადა მარშანიამ.

ნინო ექვთიმიშვილი