პოლიტიკა
პოლიტიკურ დღის წესრიგს არსებითად “ქართული ოცნება” განსაზღვრავს, ეს მოსწონს თუ არა მარგველაშვილს და ვიცით, რომ არ მოსწონს - ირაკლი კობახიძე
პარლამენტის თავმდჯომარის, ირაკლი კონახიძის ვარაუდით, თუ მოქმედი პრეზიდენტი გიორგი მარგველაშვილი მონაწილეობას მიიღებს საპრეზიდენტო არჩევნებში, ის სოლიდურ შედეგს ვერ აჩვენებს.
კობახიძის შეფასებით, მარგველაშვილის განცხადებები სპეკულაციაა.
პარლამენტის თავმჯდომარის თქმით, თვის ბოლომდე, პარტიაში საპრეზიდენტო კანდიდატთან დაკავშირებით კონსულტაციები გაიმართება, რის საფუძველზეც არჩევნებში „ქართული ოცნების“ მონაწილეობასთან დაკავშირებით განცხადება გაკეთდება.
„ჩვენი დღის წესრიგი გვაქვს, დადგენილია გარკვეული სამართლებრივი ვადები და პოლიტიკური კუთხითაც შეგვიძლია ვადები განვსაზღვროთ, კანდიდატის დასახელება მომგებიანი როდის არის. კონსულტაციები გვექნება და რაიმე სპეკულაციის საფუძველს ეს არ იძლევა, მაგრამ მარგველაშვილის მხრიდან მუდმივად სპეკულაციებს ვისმენთ. შეუძლია, გადაწყვეტილება თავისუფლად მიიღოს, რაშიც მას ხელს ვერავინ შეუშლის და არც არავინ არ უშლის. მან საკუთარ გადაწყვეტილებაზე უნდა იფიქროს და დიდად სხვების გადაწყვეტილებებზე ნუ იფიქრებს, ჩემი რჩევა ეს იქნებოდა. მან თავად უნდა გადაწყვიტოს, აქვს თუ არა შანსი, სოლიდური შედეგი დადოს. ვფიქრობ, რომ ასეთი შანსი არ არსებობს, თუმცა ეს პირველ რიგში, მან უნდა აწონ-დაწონოს. გიორგი მარგველაშვილს ვერ ვეტყვი, ის მეოთხე ადგილზე გავა, ან მეხუთეზე. რომელ ადგილზე გავა, თავად უნდა მოიფიქროს და ამის მიხედვით მიიღოს გადაწყვეტილება, უღირს თუ არა საპრეზიდენტო არჩევნებში მონაწილეობა. ანეგდოტია, მოუხელთებელი ჯოს შესახებ და შეგვიძლია, ეს ანეკდოტი გავიხსენოთ. არ შეიძლება, ადამიანმა თავი ისეთ ფიგურად წარმოაჩინოს, რომელიც რეალურად არ არის. ჩვენ ჩვენი დღის წესრიგი გვაქვს, პოლიტიკურ დღის წესრიგს არსებითად “ქართული ოცნება” განსაზღვრავს, ეს მოსწონს თუ არა მარგველაშვილს და ვიცით, რომ არ მოსწონს. შესაბამისად, დღის წესრიგის განსაზღვრაში პრეზიდენტის როლი მინიმალურია“, – განაცხადა კობახიძემ.
გუშინ სამოქალაქო საზოგადოებასთან შეხვედრაზე საქართველოს პრეზიდენტმა კითხვაზე, იქნება თუ არა საპრეზიდენტო კანდიდატი, განაცხადა, რომ პასუხის არგაცემით სამსახურს გაუწევს პოლიტიკურ ელიტას, როგორც მმართველ „ქართულ ოცნებას“, ასევე ოპოზიციას.
მარგველაშვილმა თქვა, რომ აღნიშნულ კითხვაზე დადებითი პასუხის შემთხვევაში „ქართული ოცნება“ უფრო ძლიერ კანდიდატს წარადგენს, ხოლო უარყოფითი პასუხისას - უფრო სუსტს