პოლიტიკა

პოლიცია გახდა მძევალი ივანიშვილის და ფაქტობრივად, თანაორგანიზატორი ძალადობისა - გიორგი გაბაშვილი

დარჩენილია სულ რაღაც 4 თვე და ერთადერთი, რაც მათ შეუძლიათ მშვიდობიანად გადააბარონ ხელისუფლება, იმიტომ, რომ ეს არის გაკოტრებული პოლიტიკური ძალა ყველა თავის ინსტიტუტით და ყველა თავის სახით, - განაცხადა საპარლამენტო უმცირესობის წევრმა, გიორგი გაბაშვილმა სპეციალურ ბრიფინგზე და ნაციონალური მოძრაობის მიერ საპარლამენტო საქმიანობისთვის ბოიკოტის გამოცხადების მიზეზები განმარტა.

,,პრაქტიკულად არცერთი ინსტიტუტი არ მუშაობს. ჩვენ ვხედავთ, რომ პოლიცია გახდა მძევალი ივანიშვილის და ფაქტობრივად, თანაორგანიზატორი ძალადობისა, პასიური დამკვირვებელი ზოგ შემთხვევაში, შეშინებული ზოგ შემთხვევაში.

პროკურატურა არის მონურ მდგომარეობაში. ასრულებს ივანიშვილის დავალებებს.

ასეთივე მდგომარეობაში არიან მინისტრები. ასეთივე მონურ მდგომარეობაშია პრემიერ-მინისტრი და საპარლამენტო უმრავლესობაც. ამ ვითარებაში ჩვენი ამოცანა არ არის, რომ აქ ვითამაშოთ ინსტიტუტობანა, როცა ინსტიტუტები ჩამოშლილია. მათ შორის ჩამოშლილია პარლამენტიც. შესაბამისად, ჩვენ ვაცხადებთ ბოიკოტს, მანამ სანამ არ იქნებიან დასჯილი დამანაშავეები ორგანიზატორები და დამკვეთები. ამ ხელისუფლებამ უნდა იცოდეს, ძალადობით ვერაფერს გახდება. 8 ოქტომბერს არის არჩევნები და ამ არჩევნებზე დადგება ზუსტად ის შედეგი, რაც დადგა გურიასა და სამეგრელოში, ნასაკირალსა და კორცხელში. დარჩენილია სულ რაღაც 4 თვე და ერთადერთი, რაც მათ შეუძლიათ მშვიდობიანად გადააბარონ ხელისუფლება, იმიტომ, რომ ეს არის გაკოტრებული პოლიტიკური ძალა ყველა თავის ინსტიტუტით და ყველა თავის სახით’’, - განაცხადა გიორგი გაბაშვილმა.

ნინო ექვთიმიშვილი