პოლიტიკა
პრეზიდენტი იმედოვნებს, რომ საარჩევნო სისტემა შეიცვლება - ეკა მიშველაძე
პრეზიდენტი მიესალმება საარჩევნო სისტემის ცვლილებასთან დაკავშირებით სამოქალაქო სექტორისა და არასაპარლამენტო ოპოზიიცის გააქტიურებას.
შესაბამისი განცხადება პრეზიდენტის ადმინისტრაციაში გამართულ ბრიფინგზე პრეზიდენტის პრესსპიკერმა, ეკა მიშველაძემ გააკეთა.
,,ეს ის თემაა, რაზეც პრეზიდენტი მუდმივად საუბრობს, მათ შორის, საპარლამენტო გამოსვლებშიც. ისიც მოგეხსენებათ, რომ დაახლოებით წელიწადნახევრის წინ, სწორედ პრეზიდენტის ხელშეწყობით დაიწყო მუშაობა საარჩევნო კანონმდებლობის გაუმჯობესებისთვის, შეთანხმებული დოკუმენტის შესაქმნელად. ამ პროცესში ჩართული იყვნენ როგორც ადგილობრივი და საერთაშორისო ორგანიზაციები, ასევე ყველა პოლიტიკური ძალა, გარდა კოალიცია ქართული ოცნებისა. პრეზიდენტი იმედოვნებს, რომ ამჯერად მაინც ეს მცდელობა წარმატებით დასრულდება და საარჩევნო სისტემა შეიცვლება, რაც იყო მმართველი ძალის მიერ, ჯერ კიდევ 2012 წელს გაცემული დაპირება. ის რომ, ცვლილებები საარჩევნო სისტემის მხრივ აუცილებელი და მნიშვნელოვანია, 2016 წლის საპარალმენტო არჩევნებზეც დადასტურდა’’, - განაცხადა ეკა მიშველაძემ.
ნინო ექვთიმიშვილი