კომენტარი
პრეზიდენტის შვილის მეგობრები ინდულგენციით ვერ ისარგებლებენ - ირაკლი სესიაშვილი
პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, პრეზიდენტის შვილის მეგობრები ინდულგენციით ვერ ისარგებლებენ.
სესიაშვილი აღნიშნავს, რომ გასულ წელს თავად პრეზიდენტი აცხადებდა, რომ მისი ოჯახის წევრებზე თავდასხმას აქვს ადგილი, მაშინ როდესაც, სესიაშვილის თქმით, სამართალდამცველებმა შესაბამისი პროცედურული ქმედებები განახორციელეს.
„ამიტომ, ვფიქრობ, რომ ამ შემთხვევაშიც იგივე ტენდენციასთან გვაქვს საქმე. დიდი ბოდიში და პრეზიდენტის ქალიშვილის მეგობრები ინდულგენციით ვერ ისარგებლებენ. მე არავის არ ვადანაშაულებ, უდანაშაულობის პრეზუმციის პრინციპებს პატივს ვცემ, მაგრამ საუბარი იმაზე, რომ რახან პრეზიდენტის მეგობარია და მეგობრის მეგობარია და ხელუხლებელი უნდა იყოს და ჩვენ საზოგადოება, ახლგაზრდები და მომავალი თაობა უნდა შეეგუოს და ტაში დაუკრას, რომ თურმე ნარკომანია ამ ქვეყანაში მისაღებია - დიდი ბოდიში და ამას ვერ ავყვებით ნამდვილად“,-აღნიშნა თავდაცვის კომიტეტის თავმჯდომარემ.
მისივე თქმით, „ქართულ ოცნებას“ არავითარი პოლიტიკური ინტერესი არ აქვს, რომ პრეზიდენტის შვილის მეგობრებზე ზეწოლა განახორციელოს.
„დავუშვათ, რომ „ქართულ ოცნებას“ აქვს მიზანი პრეზიდეტს რაიმე სახის პოლიტიკური დარტყმა მიაყენოს. თეორიულად დავუშვათ. და „ქართული ოცნება“ განსაზღვრავს სტრატეგიას, რომ პრეზიდენტის შვილის მეგობრების მიმართ განახორციელოს რაიმე ზეწოლა?! და ეს რაიმე შედეგს მოიტანს, პოლიტიკურ შედეგს? ასეთი რამე ჩვენს ოპონენტებს უბრალოდ გააძლიერებს და მისცემს საშუალებას უფრო მეტი ილაპარაკონ და პოლიტიკური სპეკულირება მოახდინონ. თქვენ ხედავთ რაიმე რაციონალურ მიზანს ხელისუფლების მხრიდან, რომ დაინტერესებული იყოს, არიქა პრეზიდენტის შვილის მეგობრებს დავერიოთ და ყველა ნარკომანად ვაქციოთ? ეს ხომ აბსურდია, ეს ხომ სრული სისულელეა“,-განაცხადა სესიაშვილმა.
მონიკა დავლიანიძე