საზოგადოება

პროპორციული სიით არჩეულმა დეპუტატობის 77-ვე კანდიდატმა ნარკოლოგიური შემოწმება გაიარა

ცენტრალური საარჩევნო კომისიის ინფორმაციით, მე-9 მოწვევის პარლამენტში პროპორციული სისტემით არჩეულ, საარჩევნო სიით პარლმენტში შემსვლელ სავარაუდო წევრებს ნარკოლოგიური შემოწმება გავლილი აქვთ და მათ შორის არცერთი არ არის ნარკოტიკების მომხმარებელი.

ამის შესახებ ცესკოს სპიკერმა ჟურნალისტებს აცნობა და აღნიშნა, რომ შემოწმება გავლილი აქვს პარტიული სიით არჩეულ, დეპუტატობის 77-ვე კანდიდატს.

,,კანონმდებლობის თანახმად, საქართველოს პარლამენტის პროპორციული საარჩევნო სისტემით სავარაუდოდ არჩეულ თითოეულ წევრს, კენჭისყრის დღიდან 7 დღის ვადაში უნდა გაევლო ნარკოლოგიური შემოწმება და კენჭისყრის დღიდან ორი კვირის განმავლობაში შემოწმების შესახებ ინფორმაცია შესაბამის სამედიცინო დაწესებულებებს უნდა მოეწოდებინა ჩვენთვის. ამავდროულად, პარტიებსაც ჰქონდა შესაძლებლობა აღნიშნული ინფორმაცია მოეწოდებინათ საარჩევნო ადმინისტრაციისათვის.

ამ ეტაპზე აბსოლუტურად ყველა კანდიდატს აქვს წარმოდგენილი ინფორმაცია, თითეული საარჩევნო სუბიექტის მიერ არის წარდგენილი ინფორმაცია სავარაუდოდ არჩეული წევრების ჯანმრთელობის მდგომარეობის შესახებ და თითეულ ცნობაში არის მითითებული, რომ ისინი არ არიან ნარკოტიკების მომხმარებლები”, - განაცხადა ანა მიქელაძემ.

რაც შეეხება მაჟორიტარობის კანდიდატებს, კანონმდებლობის თანახმად, მათ შესაბამისი შემოწმება მაჟორიტარ კანდიდატად რეგისტრაციისას უნდა გაევლოთ.

,,საარჩევნო კოდექსის” მიხედვით, საქართველოს პარლამენტის წევრად არ შეიძლება აირჩეს ნარკომანი ან ნარკოტიკების მომხმარებელი, ხოლო თუ ეს პირი შესაბამისმა საარჩევნო კომისიამ არჩეულად გამოაცხადა, პარლამენტს უფლება არა აქვს, ცნოს მისი უფლებამოსილება.

მარი ნამგალაძე