საზოგადოება
„ქართულ ჭიდაობას“ ეროვნული ძეგლის სტატუსი მიენიჭა
საქართველოს მთავრობის გადაწყვეტილებით, „ქართულ ჭიდაობას“ ეროვნული ძეგლის სტატუსი მიენიჭა. ინიციატივა საქართველოს კულტურისა და ძეგლთა დაცვის სამინისტროს ეკუთვნის.
კულტურის სამინისტროს მიერ გავრცელებულ განცხადებაში წერია, რომ „ქართული ჭიდაობა“ ქართველების იდენტობის განმსაზღვრელია და ერის თვითმყოფადობას გამოხატავს. ასევე ხაზგასმულია ამ სპორტის სახეობის „სიძველე“ .
„ჭიდაობა სპორტის უძველესი სახეობაა, რომელიც ფართოდ იყო გავრცელებული საქართველოში. მისი, როგორც სპორტის ეროვნული სახეობის სიძველეზე მეტყველებს „ალავერდის“ კედელზე შესრულებული ჭიდაობის სცენაც. სცენაზე აღბეჭდილი პერსონაჟთა სახეები, სამოსი და მოძრაობის პლასტიკა, ერთმნიშვნელოვნად მიანიშნებს ქართულ ტრადიციულ საჭიდაო ხელოვნებაზე. მსგავსი შეჯიბრება საქართველოში თან სდევდა რელიგიურ დღესასწაულებს“, - ნათქვამია უწყების განცხადებაში.
2014 წელს კულტურული მემკვიდრეობის დაცვის ეროვნულმა სააგენტომ „ქართულ ჭიდაობას“ არამატერიალური კულტურული მემკვიდრეობის ძეგლის სტატუსი მიანიჭა.
ანა მებურიშვილი