კომენტარი

ქეთევან ციხელაშვილი უარყოფს ინფორმაციას, რომ გიორგი გიუნაშვილი სხვა პატიმარზე გაცვალეს

შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი უარყოფს გავრცელებულ ინფორმაციას, რომლის თანახმადაც, ცხინვალის იზოლატორიდან გუშინ გათავისუფლებული გიორგი გიუნაშვილი სხვა პატიმარზე გაცვალეს.

”ეს არ იყო გაცვლა, ეს ადამიანი გათავისუფლდა პატიმრობიდან,“ -ასე პასუხობს ქეთევან ციხელაშვილი ჟურნალისტების შესაბამის კითხვას.

მისი თქმით, გიუნაშვილის გათავისუფლება ოსურ და აფხაზურ მხარესთან რამდენიმეწლიანი თანამშრომლობის შედეგია.

„გაცვლაზე ახლა არ არის საუბარი, აქ არის საუბარი იმაზე, რომ ეს ადამიანი გათავისუფლდა. თქვენ იცით იმ ადამიანების გვარები და ეს მედიაშიც გამოქვეყნდა, რომლებიც წინა წლებში გათავისუფლდნენ. წინა წლებში აფხაზური მხარე ძალიან აქტიურად მუშაობდა და მაშინაც აღვნიშნეთ მათი პოზიტიური როლი ამ პროცესში. ამ შემთხვევაში გაცვლა არ ყოფილა, გათავისუფლდა ეს ადამიანი პატიმრობიდან“, - აცხადებს ციხელაშვილი.

ნინო ექვთიმიშვილი