საზოგადოება

რესპუბლიკური პარტია მართლმადიდებელი ეკლესიის დაფინანსების გადახედვას ითხოვს

რესპუბლიკური პარტია საპატრიარქოს დაფინანსების გადახედვას ითხოვს.

პარტიის ლიდერები: ხათუნა სამნიძე და თამარ კორძაია აღნიშნავენ, რომ სხვადასხვა ხელისუფლების, მათ შორის, შევარდნაძე-აბაშიძის რეჟიმის პირობებში, ეკლესია იღებდა მატერიალურ ხელშეწყობას, რამაც სააკაშვილის დროს მიიღო უფრო მრავალფეროვანი ფორმა, დღეს კი ეს პრაქტიკა კიდევ უფრო რადიკალური ფორმების გახდა.

არასაპარლამენტო ოპოზიციის განცხადებით, კონსტიტუციური შეთანხმება, რომლითაც მართლმადიდებელი ეკლესია სახელმწიფოსგან, კომპენსაციის სახით, რამდენიმე მილიონ ლარს ყოველწიურად იღებს, დაფინანსების რაოდენობისა და არამიზნობრიობის გამო უხეშად ირღვევა.

„ვთვლით, რომ ამ რთულ ვითარებაში მნიშვნელოვანია, გაიმიჯნოს ეკლესია და სახელმწიფო. არ გასცდეს კონკორდატით შეთანხმებულ ნორმებს არც ხელისუფლება და არც ეკლესია, რასაც დღეს აქვს ადგილი და შეწყდეს მართლმადიდებლური ეკლესიის დაფინანსების დღეს არსებული პოლიტიკა. თუ ვლაპარაკობთ კომპენსაციაზე, რაც განსაზღვრულია კონკორდატით, ვისაუბროთ კომპენსაციაზე და ეს უნდა იყოს დასაბუთებული და კონკრეტული“,-განაცხადა პარტიის თავმჯდომარემ ხათუნა სამნიძემ.

თამარ კორძაიამ კი აღნიშნა, რომ ეკლესიისთვის ქონების გადაცემა დედაქალაქსა და რეგიონებში ყოველგვარი პროცედურებისა და კვლევის გარეშე ინტენსიურად მიმდინარეობს.

„გარდა პირდაპირ საპატრიარქოსთვის მიწების სიმბოლურ ფასად გადაცემისა, საპატრიარქოს 100%-ანი წილობრივი მონაწილეობით არსებულ შპს-ებს, საპატრიარქოს მიერ დაფუძნებულ არაკომერციულ- იურიდიულ პირებსაც გადასცემენ სახელმწიფო ქონებას და ამ ქონების აღრიცხვას აღარავინ არ ახდენს“,-აღნიშნა თამარ კორძაიამ.

მონიკა დავლიანიძე