კომენტარი

რუსეთმა საქართველოს ჰიბრიდული ომი გამოუცხადა - ბათუ ქუთელია

საქართველოს ატლანტიკური საბჭოს ვიცე-პრეზიდენტის ბათუ ქუთელიას განცხადებით, რუსეთმა საქართველოს ჰიბრიდული ომი გამოუცხადა.

ქუთელიას თქმით, ამ დროს პირადი კეკლუცობისა და პოლიტიკური ამბიციების დრო არ არის. - ამის შესახებ ქუთელიამ პრეზიდენტის დღევანდელი უშიშროების საბჭოს სხდომის კომენტირებისას განაცხადა, რომელსაც პარლამენტის თავმჯდომარე ვერ დაესწრება.

„დღეს ჩვენ გვაქვს ღია გამოცხადებული ჰიბრიდული ომი რუსეთის მრიდან. აქ პირადი კეკლუცობის, პირადი პოლიტიკური ამბიციების დაკმაყოფილების დრო არ არის. შესაბამისად, ყველა ვინც ვალდებული არის, რომ დაესწროს და მიიღოს მონაწილეობა უნდა მიიღოს, და უფრო მეტიც, ამ გადაწყვეტილებების შესაბამისად, შემდგომი მუშაობაც უნდა გაგრძელდეს სწორედ ერთობლივი სამთავრობო კოორდინირებული მოქმედებების ფონზე. წინააღმდეგ შემთხვევაში ჩვენ შეიძლება ძალიან ძვირად დაგვიჯდეს, ჩვენი სახელმწიფოებრიობის კუთხით“,-განმარტა ექსპერტმა.

უშიშიროების საბჭოს სხდომა 17:00-ზე გაიმართება. სხდომაზე მონაწილეობის მისაღებად მიწვეულნი არიან საბჭოს მუდმივი წევრები და საგარეო საქმეთა მინისტრის მოადგილე დავით დონდუა.

თუმცა, პარლამენტის თავმჯდომარე ირაკლი კობახიძე სხდომას ვერ დაესწრება, რადგან საკანონმდებლო ორგანოში პლენარული სხდომაც არის ჩანიშნული, შესაბამისად, კობახიძეს ქუთაისში უწყევს ყოფნა.

უშიშიროების საბჭოს დღევანდელი სხდომაზე ოთხი განსახილველი თემაა: შავი ზღვის რეგიონში არსებული უსაფრთხოების გარემო; საქართველო-ნატო -საქართველოს მონაწილეობა შავი ზღვის უსაფრთხოების დიალოგში და თანამშრომლობის ფორმატები, საქართველო-ნატოს პარტნიორობის დღის წესრიგი; ასევე, რეფორმები თავდაცვის სამინისტროში; და ეროვნული უსაფრთხოების სისტემა ჰიბრიდული საფრთხეების ფონზე და საქართველოს პრეზიდენტის ინიციატივა: „საქართველოს ეროვნული უშიშროება - ერთიანი ეროვნული მიდგომა“.

მონიკა დავლიანიძე