მსოფლიო

სააკაშვილი ვალდებულია დაემორჩილოს კანონს და არ მოახდინოს სისხლისა და შეტაკებების პროვოცირება - უკრაინის შს მინისტრი

უკრაინის შინაგან საქმეთა მინისტრმა არსენ ავაკოვმა მოუწოდა საქართველოს ყოფილ პრეზიდენტსა და ოდესის ექს-გუბერნატორ მიხეილ სააკაშვილს, კანონს დაემორჩილოს. ამის შესახებ უწყების ხელმძღვანელმა ტვიტერის საკუთარ გვერდზე დაწერა.

„ნებისმიერი კონფლიქტის მოგვარება მხოლოდ კანონიერი გზით უნდა ხდებოდეს - სანამ არ იქნება სასამართლოს გადაწყვეტილება, ყველაფერი, რაც ხდება, გამოსავალს ვერ იპოვის. სააკაშვილი ვალდებულია, დაემორჩილოს კანონის მოთხოვნებს, გაიაროს კანონიერი პროცედურები და უპასუხოს წარდგენილ ბრალდებებს და არ მოახდინოს სისხლისა და შეტაკებების პროვოცირება“, - დაწერა ავაკოვმა.

ოდესის ექს-გუბერატორი დღეს დააკავეს. სპეცრაზმელებმა ის მანქანაში ჩასვეს, თუმცა კიევის ცენტრიდან მისი გამოყვანა ვერ მოხერხდა სააკაშვილის მხარდამჭერების წინააღმდეგობის გამო.

მიხეილ სააკაშვილის მხარდამჭერებმა შეამტვრიეს იმ მანქანის კარები და ფანჯრები, რომელშიც დაკავებული საქართველოს ექს-პრეზიდენტი იჯდა და იქიდან გამოიყვანეს.

ანა მებურიშვილი