საზოგადოება

საიდან მოიპოვა ნიკა რურუამ ამომრჩევლების პირადი ტელეფონის ნომრები - თამარ ქალდანი

პერსონალურ მონაცემთა დაცვის ინსპექტორი თამარ ქალდანი ინტერესდება, საიდან მოიპოვა ნაციონალური მოძრაობის წევრმა, მთაწმინდის მაჟორიტარი დეპუტატობის კანდიდატმა ნიკა რურუამ ამომრჩეველთა პირადი ტელეფონის ნომრები.

ქალდანის განცხადებით, მის უწყებას რამდენიმე მოქალაქე მიმართა განცხადებით, რომ მათ რურუას შტაბიდან დაუკავშირდნენ.

„ჩვენ მივმართეთ ბატონ ნიკა რურუას და ველოდებით მისგან დამატებით ინფორმაციის მოწოდებას, მათ შორის იმასაც, უშუალოდ ფლობს თუ არა სატელეფონო ნომრებს, რა ნიშნით შეარჩია, საიდან მოიპოვა ეს სატელეფონო ნომრები“,-განუცხადა ქალდანმა ჟურნალისტებს.

მისი თქმით, საარჩევნო კანონმდებლობა სატელეფონო, ან მოკლე ტექსტური შეტყობინებით კონტაქტს არ ზღუდავს, თუმცა ამ შემთხვევაში, მას სჭირდება დამატებითი ინოფრმაცია, იყო თუ არა რაიმე დარღვევა, და თუ იყო, რა ტიპის დარღვევაზე შეიძლება იყოს საუბარი.

მონიკა დავლიანიძე