პოლიტიკა

სახალხო დამცველის 2016 წლის ანგარიშის მოსასმენად დეპუტატები არ მივიდნენ

სახალხო დამცველის ადამიანის უფლებათა და თავისუფლებათა დაცვის შესახებ 2016 წლის ანგარიშის საკომიტეტო მოსმენა პარლამენტში ჩაიშალა, რადგან დარბაზში პარლამენტარები არ შევიდნენ.

დეპუტატები პარლამენტის ადამიანის უფლებათა დაცვის, იურიდიულ საკითხთა და თავდაცვისა და უშიშროების კომიტეტების გაერთიანებულ სხდომაზე სუს-ის ანგარიშს უსმენდნენ.

ომბუდსმენისთვის კი ამის შესახებ არაფერი უცნობებიათ.

დეპუტატების მოლოდინში უჩა ნანუაშვილმა ანგარიშის დეტალებზე ჟურნალისტებთან ისაუბრა. მისი თქმით, 2016 წლის ანგარიშში სუს-ის მისამართით შენიშვნა-რეკომენდაციებიც აქვთ.

,,ანგარიშში საუბარია იმ საკანონმდებლო ხარვეზზე, რაც ფარულ მიყურადებასთან დაკავშირებით არსებობს. მიგვაჩნია, რომ საკონსტიტუციო სასამართლოს გადაწყვეტილება არ შესრულებულა, რჩება რეალურ დროში მოსმენების რისკები. ანგარიშში ვსაუბრობ ასევე უმაღლეს სასწავლებლებში ოდეერების შესახებ. მიუხედავად იმისა, რომ ეს აკრძალულია, მსგავსი პრაქტიკა სავარაუდოდ არსებობდა. გვქონდა რეკომენდაცია, პარლამენტში დროებითი საგამოძიებო კომისია შექმნილიყო, რომელიც ამ საკითხს განიხილავდა"- განაცხადა ნანუაშვილმა.

მოგვიანებით, ადამიანის უფლებათა დაცვის კომიტეტის თავმჯდომარემ სოფო კილაძემ განაცხადა, რომ ეს შეხვედრა 2 მაისისთვის გადაიდო. სოფო კილაძემ კომიტეტის სხდომის ჩაშლა სუს-ის ანგარიშის წარდგენაზე დეპუტატების დიდი ინტერესით ახსნა.

ნინო ექვთიმიშვილი