პოლიტიკა

სამწუხაროა, რომ ეს სარწმუნო ინფორმაცია მართლდება - ირაკლი კობახიძე

სარწმუნო ინფორმაცია გვქონდა, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს, მათ მიერ კომისიის დატოვებასთან დაკავშირებით, - განაცხადა საქართველოს პარლამენტის თავმჯდომარე, ირაკლი კობახიძემ საკონსტიტუციო კომისიის სხდომაზე.

მისი თქმით, პროცესი, რომელიც საკონსტიტუციო კომისიამ დაიწყო, წარმატებით დასრულდება.

”გვქონდა სარწმუნო ინფორმაცია, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს, მათ მიერ კომისიის დატოვებასთან დაკავშირებით. სამწუხაროა, რომ ეს სარწმუნო ინფორმაცია მართლდება. რამდენიმე სუბიექტს, ჩვენი ინფორმაციით, დაგეგმილი აქვს შესაბამისი გადაწყვეტილების გახმოვანება, თუმცა ეს ყველაფერი, ბუნებრივია, ხელს ვერ შეუშლის იმ სამუშაოს ბოლომდე მიყვანას, რომელიც ჩვენ დავიწყეთ სახელმწიფო საკონსტიტუციო კომისიაში. ჩვენ აუცილებლად შევასრულებთ დასახულ მიზანს, რომელიც საქართველოს პარლამენტმა დაგვისახა და საბოლოოდ შედეგი იქნება ძალიან დახვეწილი კონსტიტუციის შექმნა“, - განაცხადა ირაკლი კობახიძემ.

შეგახსენებთ, რომ აღნიშნულ საკითხზე პარლამენტის თავმჯდომარემ რამდენიმე დღის წინ პარლამენტში პრეზიდენტის ყოველწლიური მოხსენების შეფასებისას ისაუბრა და აღნიშნა, რომ პრეზიდენტი და პრეზიდენტის ადმინისტრაცია აწარმოებენ ღია კამპანიას საკონსტიტუციო კომისიის წინააღმდეგ.

ნინო ექვთიმიშვილი