კომენტარი
საქართველო არის დასავლეთის მოკავშირე კავკასიაში - არიელ კოენი
აშშ-ს გლობალური უსაფრთხოების ანალიზის ინსტიტუტის უფროსი მკლევარის არიელ კოენის განცხადებით, საქართველო ამერიკისთვის მთავარი მოკავშირეა კავკასიის რეგიონში და საჭიროა ამ კავშირის განმტკიცება.
ამის შესახებ კოენმა ჯორჯ ვაშინგტონის უნივერსიტეტში განაცხადა, სადაც საქართველოსა და აშშ-ს შორის უსაფრთხოების და თავდაცვის სფეროში პარტნიორობის შესახებ მსჯელობა გაიმართა, - წერს ამერიკის ხმის ქართული რედაქცია.
“ჩვენ უნდა გვახსოვდეს, რომ საქართველო არის დასავლეთის მოკავშირე მის საზღვარზე, კავკასიაში და არის მზად დასავლეთთან, ამერიკასთან და ნატო-თან მჭიდრო თანამშრომლობისთვის. ჩვენ უნდა ვეცადოთ საქართველოს უსაფრთხოების დაცვას და ვითანამშრომლოთ ეკონომიკური, სამოქალაქო და კულტურული კუთხითაც“, - აღნიშნა კოენმა.
მისივე თქმით, 2008 წლის ომის დროს სანქციების სწრაფმა გაუქმებამ რუსეთის წინააღმდეგ, უკრაინის კონფლიქტს წინაპირობა შეუქმნა.
„2008 წლის ომის შემდეგ, ამერიკის შეერთებულ შტატებს და ევროპას მეტი რამ შეეძლო გაეკეთებინა და შეენარჩუნებინა სანქციები რუსეთის წინააღმდეგ, თუმცა ეს ასე არ მოხდა, რამაც ნაწილობრივ განაპირობა შემდგომში რუსეთის მიერ უკრაინის წინააღმდეგ დაწყებული კამპანია“, - აღნიშნა მან.