კონფლიქტის ზონა

საქართველოს მიერ ჩატარებულმა სამედიცინო ექსპერტიზამ არ გასცა ნათელი პასუხები კითხვაზე, იყო ნაწამები თუ არა ტატუნაშვილი - ოკუპირებული ცხინვალის წარმომადგენელი

„ქართული მხარის სამედიცინო ექსპერტიზის დასკვნა არ იძლევა იმის მტკიცების საფუძველს, რომ საქართველოს მოქალაქე არჩილ ტატუნაშვილი მოკლეს“, - ამის შესახებ ინციდენტების პრევენციისა და მათზე რეაგირების მექანიზმის ფორმატში მორიგი შეხვედრის შემდეგ ოკუპირებული „სამხრეთ ოსეთის“ დელეგაციის ხელმძღვანელმა ეგორ კოჩიევმა განაცხადა.

„საქართველოს მიერ ჩატარებულმა სამედიცინო ექსპერტიზამ არ გასცა ნათელი პასუხები კითხვაზე, იყო ნაწამები თუ არა ტატუნაშვილი. შესაბამისად, ქართულ მხარეს არ აქვს არანაირი საფუძველი, ამტკიცოს, რომ მისი სიკვდილი დადგა ფიზიკური ზემოქმედების შედეგად“, - დასძინა კოჩიევმა.

ოთხოზორია-ტატუნაშვილის სიაზე კომენტირებისას ოკუპირებული სამხრეთ ოსეთის წარმომადგენელმა აღნიშნა, რომ ცხინვალი საპასუხო სიას ამზადებს, რომელშიც საქართველოს მიერ ჩადენილი სამხედრო დანაშაულები შევა.

ცნობისთვის, 22 თებერვალს არჩილ ტატუნაშვილი საქართველოს კიდევ ორ მოქალაქესთან ერთად საოკუპაციო ძალებმა გაიტაცეს. მომდევნო დღეს ოსურმა მედიამ გაავრცელა ინფორმაცია ტატუნაშვილის დაღუპვის შესახებ. თითქმის ერთი თვის შემდეგ, 20 მარტს, წითელი ჯვრის საერთაშორისო კომიტეტის მეშვეობით ოკუპირებულმა ცხინვალმა არჩილ ტატუნაშვილის ცხედარი ოჯახს გადასცა.