საზოგადოება
საქართველოში 2018 წლის სასკოლო სპორტული ოლიმპიადის რეგიონული შეჯიბრი გაიმართება
24 თებერვლიდან საქართველოში „სასკოლო სპორტული ოლიმპიადა 2018“ - ის რეგიონული თამაშები დაიწყო.
სასკოლო სპორტული ოლიმპიადა საქართველოს ბავშვთა და სასკოლო სპორტის ეროვნული ფედერაციის მიერ მე-4 წელია ტარდება, რომელშიც წელს საქართველოს 1700-ზე მეტი სკოლის 100000-მდე მოსწავლე იღებს მონაწილეობას.
სასკოლო სპორტული ოლიმპიადა სპორტის სხვადასხვა სახეობას მოიცავს.
რეგიონულ თამაშებს ოლიმპიადის დებულების თანახმად, რეგიონის ცენტრალური ქალაქები მასპინძლობს, თუმცა მასპინძლობის სურვილი გამოთქვეს მუნიციპალიტეტში შემავალმა ქალაქებმაც.
შემდეგი ეტაპი იქნება ზონალური თამაშები, რომელიც მაისში გაიმართება, ხოლო ივნისის თვეში ოლიმპიადის ფინალური თამაშები სპორტის სხვადასხვა სახეობაში საქართველოს ჩემპიონებს გამოავლენს.
ფინალისტები, რომლებიც მოიპოვებენ 2018 წლის ჩემპიონის სტატუსს, მომავალ წელს 2019 წლის ჩემპიონებს სუპერფინალში შეხვდებიან, სადაც 2020 წელს მსოფლიო სასკოლო ჩემპიონატში სპორტის სხვადასხვა სახეობაში მონაწილეობის მისაღებად საგზურის მფლობელებს გამოავლენენ.
საქართველოს სასკოლო სპორტული ოლიმპიადის რეგიონული შეჯიბრების პარალელურად, 2016-2017 წლის გამარჯვებულები ISF მსოფლიო სასკოლო ჩემპიონატის შეჯიბრებში მონაწილეობის მისაღებად გაემგზავრებიან.
საქართველოს სასკოლო სპორტული ოლიმპიადის გამარჯვებულები, ISF მსოფლიო სასკოლო ჩემპიონატზე შემდეგ სახეობებში იასპარეზებენ:
კატარი - ხელბურთი;
ისრაელი - ფუტსალი;
საფრანგეთი - გეზრბენი;
მალტა - მაგიდის ჩოგბურთი;
ინდოეთი - ბადმინტონი;
ჩეხეთი - ფრენბურთი;
სერბეთი - 3x3 კალათბურთი;
მაროკო - გიმნაზიადა.
ISF მსოფლიო სასკოლო ჩემპიონატში საქართველო მესამედ მონაწილეობს.
სასკოლო სპორტული ოლიმპიადა, საქართველოს ბავშვთა და სასკოლო სპორტის ეროვნული ფედერაციის ორგანიზებით, საქართველოს კულტურისა და სპორტის სამინისტროს, საქართველოს განათლებისა და მეცნიერების სამინისტროს დახმარებით და საქართველოს ეროვნული ოლიმპიური კომიტეტის მხარდაჭერით ხორციელდება.
„ოლიმპიადა 2018“ - ის გენერალური სპონსორია VTB ბანკი.