საზოგადოება

საქართველოში 49 000-მდე სტატუსშეჩერებული სტუდენტია

საქართველოში სტუდენტთა 24%-ს (48 624 პირს) აღნიშნული სტატუსი აქვს შეჩერებული, რაც აღემატება წინა წლის აპრილის მონაცემებს. 2017 წლის მდგომარეობით ქვეყანაში სტატუსი შეჩერებული ჰქონდა 43 661 სტუდენტს, რაც სტუდენტთა საერთო რაოდენობის 23%-ს შეადგენდა. ინფორმაციას პირველი არხი განათლების ხარისხის განვითარების ეროვნულ ცენტრზე დაყრდნობით ავრცელებს.

სტატუსშეჩერებული სტუდენტების 33,5%-ს (16 294 სტუდენტს) სტატუსი ფინანსური დავალიანების გამო აქვს შეწყვეტილი. ამასთან, 65%-ის შემთხვევაში (31 761 ) სტატუსის შეჩერების მიზეზი უცნობია. სტატუსის შეჩერების სხვა მიზეზებია: ავადმყოფობა (135 სტუდენტი), ორსულობა, მშობიარობა და ბავშვის მოვლა (223), საზღვარგარეთ სასწავლებლად წასვლა (211 პირი).

უმაღლეს სასწავლებლებს შორის ყველაზე მეტი სტატუს შეჩერებული სტუდენტი სსიპ – საქართველოს ტექნიკურ უნივერსიტეტში ფიქსირდება – 10 384 პირი (სტუდენტთა 31%), მას მოჰყვება სსიპ – ივანე ჯავახიშვილის სახელობის თბილისის სახელმწიფო უნივერსიტეტი 7 933 სტატუსშეჩერებული სტუდენტით (სტუდენტთა 30%). ილიას სახელმწიფო უნივერსიტეტს 7 588 სტატუსშეჩერებული სტუდენტი (სტუდენტთა 34%) ჰყავს, ქუთაისის აკაკი წერეთლის სახელმწიფო უნივერსიტეტს - 4 421 სტატუსშეჩერებული სტუდენტი (სტუდენტთა 37%), ბათუმის შოთა რუსთაველის სახელმწიფო უნივერსიტეტს - 1 593 სტატუსშეჩერებული სტუდენტი (სტუდენტთა 21%), სამცხე – ჯავახეთის სახელმწიფო უნივერსიტეტს - 317 სტატუსშეჩერებული სტუდენტი (სტუდენტთა 19%), ხოლო შოთა მესხიას ზუგდიდის სახელმწიფო სასწავლო უნივერსიტეტს - 172 სტატუსშეჩერებული სტუდენტი (სტუდენტთა 24%).