უახლესი ამბები
არქივი
საზოგადოება
სასამართლო გადაწყვეტილებები აუცილებლად უნდა აღსრულდეს- თეა წულუკიანმა 4 წლის წინ გათავისუფლებულ თანამშრომლებს უპასუხა
იუსტიციის მინისტრი, თეა წულუკიანი გამოეხმაურა დანაშაულის პრევენციის ცენტრის ყოფილ თანამშრომლებს - ანა სუბელიანსა და თამაზ ახობაძეს.
ორივე მათგანმა დღეს ეროვნული არქივის შენობასთან აქცია გამართა, სადაც მოითხოვეს თეა წულუკიანთან შეხვედრა და სასამართლოს გადაწყვეტილების აღსრულება. სასამართლომ დააკისრა დანაშაულის პრევენციის ცენტრს, აღადგინოს ახობაძე და სუბელიანი და 3 წლისა და 8 თვის განაცდური გადაუხადოს.
იუსტიციის მინისტრის თქმით, სასამართლოს გადაწყვეტილება უნდა აღსრულდეს.
„სასამართლო გადაწყვეტილებები აუცილებლად უნდა აღსრულდეს. ამ საქმეზეც, მათ შორის სასამართლო გადაწყვეტილება იმ ფარგლებში აღსრულდება, რაც თქვა ქართულმა სასამართლომ“, -თქვა წულუკიანმა.
თამაზ ახობაძე და ანა სუბელიანი იუსტიციის სამინისტროს სსიპ-ში დანაშაულის პრევენციის ცენტრში პროექტების მენეჯერის თანამდებობაზე მუშაობდნენ. ისინი 2014 წლის იანვარში გაათავისუფლეს. გათავისუფლებულმა თანამშრომლებმა ჯერ საქალაქო სასამართლოში, შემდეგ კი სააპელაციოში იჩივლეს. სუბელიანისა და ახობაძის მტკიცებით, მათი გათავისუფლების გადაწყვეტილება თავად იუსტიციის მინისტრმა თეა წულუკიანმა მიიღო მას შემდეგ, რაც მათ ამავე ცენტრის დირექტორის სამსახურიდან გაშვება გააპროტესტეს, მათ შორის საჯარო პოსტით სოციალურ ქსელში.