უახლესი ამბები
არქივი
კომენტარი
სასამართლომ ბოლომდე ვერ გაუძლო ზეწოლას და გამამართლებელი განაჩენი ვერ გამოიტანა - ლევან სამუშია
თავდაცვის სამინისტროს 5 მაღალჩინოსნის ინტერესების დამცველი, ლევან სამუშია აცხადებს, რომ ე.წ. კაბელების საქმეზე სააპელაციო სასამართლოს დღევანდელი განაჩენის შემდეგ სამართლებრივი დავა გაგრძელდება ჯერ უზენაეს სასამართლოში და არ არის გამორიცხული, რომ საქმე სტრასბურგის სასამართლომდეც მივიდეს.
,,ბუნებრივია, სასამართლომ ბოლომდე ვერ გაუძლო ზეწოლას და გამამართლებელი განაჩენი ვერ გამოიტანა ამ საქმეზე. ერთი დადასტურდა, რასაც თავიდანვე ვამბობდით ამ საქმეზე, რომ გაფლანგვა არ ყოფილა. დღეს სასამართლოს გადაწყვეტილებით ჩვენი დაცვის ქვეშ მყოფები კიდევ ორი თვე იქნებიან ტყვეობაში. ჩვენ, ბუნებრივია, ბოლომდე ვიბრძოლებთ. ეს შედეგი არ არის დამაკმაყოფილებელი ჩვენთვის და დარწმუნებული იყავით, რომ ამ საქმეზე საბოლოოდ დადგება გამამართლებელი განაჩენი და საბოლოოდ იზეიმებს სამართალი’’, - განუცხადა ჟურნალისტებს ლევან სამუშიამ.
ცნობისათვის: ე.წ. კაბელების საქმეზე ბრალდებულები სააპელაციო სასამართლომ დამნაშავედ ცნო, თუმცა მუხლის გადაკვალიფიცირება მოხდა. კერძოდ, სააპელაციო სასამართლოს გადაწყვეტილებით მუხლი, რომლითაც მსჯავრდებულები გასამართლდნენ, გადაკვალიფიცირდა სამსახურებრივი უფლებამოსილების ბოროტად გამოყენებაში, რის საფუძველზეც მსჯავრდებულებს სასჯელის ვადა შეუმცირდათ.
ნინო ექვთიმიშვილი