პოლიტიკა

სასამართლოს გადაწყვეტილება რუსთავი 2-ზე ადგილობრივმა არასამთავრობოებმა მთავრობის სავარაუდო ჩარევად შეაფასეს - Amnesty International-ი

საერთაშორისო ორგანიზაციის Amnesty International-ის ყოველწლიურ ანგარიშში მოხვდა ტელეკომპანია „რუსთავი 2“-ის მფლობელობასთან დაკავშირებული სასამართლო დავა. დოკუმენტში წერია, რომ ხელისუფლების მხარდამჭერი ყოფილი მფლობელისთვის არხის დაბრუნება შეფასებული იყო მთავრობის სავარაუდო ჩარევად.

„2 მარტს უზენაესმა სასამართლომ ტელეკომპანიის ყოფილი მფლობელებისათვის, რომლებიც ხელისუფლების მხარდამჭერებად მიიჩნევიან, დაბრუნება ბრძანა, რითიც ძალაში დატოვა პირველი ინსტანციისა და სააპელაციო სასამართლოების გადაწყვეტილებები.

ადგილობრივმა არასამთავრობო ორგანიზაციებმა მთავრობის სავარაუდო ჩარევის თაობაზე შეშფოთება გამოთქვეს და სასამართლო პროცესი უსამართლოდ შეაფასეს. მარტში ადამიანის უფლებათა ევროპულმა სასამართლომ უზენაესი სასამართლოს გადაწყვეტილების შეჩერება მოითხოვა, ვიდრე თავადაც არ განიხილავს საქმეს“, - ნათქვამია ანგარიშში.