პოლიტიკა

შენი სამშობლოს ნაწილების დასაბრუნებლად პუტინთან კი არა, სად არ უნდა წახვიდე ადამიანი - ადა მარშანია

საქართველოს პარლამენტის რიგგარეშე სესიაზე დეპუტატები საგარეო პოლიტიკის რეზოლუციის პროექტზე მსჯელობენ.

საკითხის განხილვისას ტრიბუნაზე სიტყვით გამოვიდა ფრაქცია ,,საქართველოს პატრიოტების’’ წევრი ადა მარშანია და საკუთარ გამოსვლაში რუსეთის საოკუპაციო პოლიტიკას შეეხო და რუსეთთან დიალოგის აუცილებლობაზე გაამახვილა ყურადღება.

მან ნაციონალური მოძრაობის წევრ, რომან გოცირიძესაც მიმართა კითხვით, თუ რა არის საქართველოს მიზანი, ნატო-ში შესვლა თუ აფხაზეთის დაბრუნება.

,,მივხედოთ ჩვენს ქვეყანას, პირველ რიგში, უვარგისი მთავრობა რომ გვყავს ამას მივხედოთ. რატომ გვიზის აქ პარლამენტში მკვლელების და პროვოკატორების ძალა?!

რა არის ჩვენი მიზანი რომან, ნატოში შესვლა, თუ სოხუმში შესვლა, მიპასუხე? რად გვინდა ეს ნატო ჩვენ, ქვეყანა რომ გავამთლიანოთ, თუ როგორღაც შევიდეთ და მერე ჯანდაბას. გამთლიანდება ასე ქვეყანა?

წადით ხალხო, მოსკოვში, დაელაპარაკეთ ამ რუსეთს, ამ ოკუპანტ რუსეთს. რატომ არის ეს მიუღებელი, რატომ არის ეს შეუძლებელი? პუტინი პრეზიდენტია რუსეთის ფედერაციის, გველეშაპი კი არ არის, ადამიანია ჩვეულებრივი. შენი სამშობლოს ნაწილების დასაბრუნებლად პუტინთან კი არა, სად არ უნდა წახვიდე ადამიანი’’, - განაცხადა ადა მარშანიამ.

ნინო ექვთიმიშვილი