კომენტარი

შესაძლებელია, მეტროს მემანქანეების პასუხისმგებლობის საკითხი დადგეს - ირაკლი ხმალაძე

შესაძლებელია, მეტროს მემანქანეების პასუხისმგებლობის საკითხი დადგეს, - განუცხადა ჟურნალისტებს თბილისის ვიცე-მერმა ირაკლი ხმალაძემ.

კალაძის მოადგილე ჯერჯერობით არ აკონკრეტებს რა ღონისძიებები იქნება მეტროს მემანქანეების მიმართ გამოყენებული - დისციპლინური პასუხისმგებლობა თუ სამსახურიდან გათავისუფლება.

„რა თქმა უნდა, შესაძლოა, პასუხისმგებლობის საკითხი დადგეს. ეს არის სამართლებრივი საკითხი. მათი მხრიდან დარღვეულია კომპანიის შინაგანაწესი, კანონი, სასამართლოს გადაწყვეტილება, რასაც მოჰყვება სამართლებრივი რეაგირება, იქნება ეს დისციპლინური პასუხისმგებლობა, სამსახურიდან გათავისუფლება თუ სხვა ღონისძიებები, ამას ცოტა მოგვიანებით გაცნობებთ“, - განაცხადა ხმალაძემ.

ვიცე-მერის თქმით, ისინი აუცილებლად უნდა დაბრუნდნენ სამუშაო ადგილებს და გააგრძელონ დედაქალაქის მომსახურება.

„ამ სიტუაციიდან მხოლოდ ერთადერთ გამოსავალს ვხედავ, რომ სამართლის და კანონის ჩარჩოებში ჩავჯდეთ. დავუბრუნდეთ ყველა იმ მოვალეობის შესრულებას, რასაც კანონი და ქალაქის ინტერესები გვავალდებულებს“, - განაცხადა ხმალაძემ.

ნინო ექვთიმიშვილი