კომენტარი

შსს-ს ღრმა პროფესიული კრიზის აქვს - გიორგი მშვენიერაძე

არასამთავრობო ორგანიზაცია „საქართველოს დემოკრატიული ინიციატივის“ წევრის, გიორგი მშვენიერაძის აზრით, შინაგან საქმეთა სამინისტრო ღრმა პროფესიულ კრიზისშია.

მშვენიერაძის თქმით, ეს კარგად გამოჩნდა იმ ვიდეო მასალების გავრცელებით, რომელიც მშვენიერაძის თქმით, ნუცუბიძის პლატოზე გარდაცვლილი მამაკაცის დისკრედიტაციას ემსახურება.

„ნუცუბიძის ფერდობზე ახალგაზრდა კაცის გარდაცვალებასთან დაკავშრებით სანამ რამეს ვიტყოდე, სწორი იქნება ექსპერტიზას დაველოდო და მისი გარდაცვალების მიზეზი გავიგო. მაგრამ იმ ღრმა პროფესიულ კრიზისს რა ვუშველოთ, შსს-ს რომ აქვს და საზოგადოებასთან ურთიერთობის სამსახურის მიერ პრიმიტიული ინსტიქტების კარნახით პროპაგანდისტული ვიდეოების (რომელი ვიდეოებიც გარდაცვლილი ადამიანის დისკრედიტაციას ემსახურება) გავრცელებაში ყველაზე კარგად გამოსჭვივის?“,-დაწერა მშვენიერაძემ.

გუშინ, შინაგან საქმეთა სამინისტრომ გვიან ღამით გაავრცელა ვიდეო მასალა, სადაც მომხდარი ინციდენტის თვითმხილველები ყვებიან, რომ გარდაცვლილი პაატა პავლიაშვილი არაფხიზელ მდოგმარეობაში იმყოფებოდა და ირგვლივ მყოფებს სიტყვიერ შეურაცხყოფას აყენებდა.

ვიდეოში ერთ-ერთი მამაკაცი ამბობს, რომ გარდაცვლილი დაკავების დროს „იყო მთვრალი, ფსიქოტროპულებსაც იყენებდა. ერთხელ თვითონ დაურეკა სასწრაფოს ფსიქიატრიულში წამიყვანეთო. მას ეს პრობლემები ქონდა. ჯანმრთელობით არ გამოირჩეოდა, სულ ლოთობდა“.

მონიკა დავლიანიძე