საზოგადოება

სიგარეტი 15 ლარამდე გაძვირდება - „უნდათ ხალხი გამოიყვანონ ქუჩაში?”

ანალიტიკოს ვახტანგ ძაბირაძისთვის გაუგებარია რას ემსახურება ფინანსთა მინისტრ ვანო მაჭავარიანის განცხადება, რომ სიგარეტი საქართველოში 15 ლარამდე გაიზრდება. მისი თქმით, წინასაარჩევნოდ მსგავსი გადაწყვეტილებები „ქართული ოცნებისთვის ნეგატიურად აისახება.

ანალიტიკოსი ხელისუფლებას რჩევას აძლევს - სიგარეტის გაძვირებამდე, საქართველოში არსებული საშუალო ხელფასი ევროპულ სტანდარტს გაუტოლოს.

„სრულიად აბსურდული ვითარება იქნება. როდესაც ასოცირების ხელშეკრულება ფორმდებოდა, მაშინ უნდა ყოფილიყო ამაზე ლაპარაკი ძალიან დაწვრილებით და ზუსტად - ჩვენ რა პერიოდში შევძლებდით იმ ვალდებულებების შესრულებას, რომელიც ასოცირების ხელშეკრულებით გვაქვს.

„როდესაც ვსაუბრობთ გაძვირებაზე და ვამბობთ, რომ ფასები ევროპის ფასებს უნდა გაუთანაბრდეს, შემოსავლები როგორია - ამას რატომ არ კითხულობს ფინანსთა მინისტრი? ვერ გამიგია ხელისუფლებას რა უნდა. ცდილობს სიტუაცია იქამდე მიიყვანოს, რომ როგორმე ხალხი ქუჩაში გამოვიდეს? ეს არ არის მხოლოდ ერთი მიმართულებით. ბევრი ფაქტორი შემოდის ერთდროულად და ისედაც გაჩანაგებულ ამ ქვეყანას სრულიად მოუღებს ბოლოს. დღეს ამის შემოღება კატასტროფაა.

„მთავრობას მივცემ ერთ კარგ რჩევას: ევროპაში საშუალო შემოსავალი ერთ სულ მოსახლეზე რამდენია და როგორია საქართველოში - სიგარეტის ფასები და არ მარტო სიგარეტის, იმ პროპორციით გაზარდოს ნებისმიერი მიმართულებით. მარტივი ფორმულა - ვიცით ევროპაში საშუალო შემოსავალი რა აქვს თითო სულ მოსახლეს, ვიცით რამდენია საქართველოში. ჩვენთან საშუალო ხელფასი ხუთასი ლარია და ეს შემოსავალიც არ აქვს ყველას. როგორც კი მოგვემატება შემოსავალი, ავწიოთ ფასი.

„ეს არის ვიღაცებისთვის ხელის მოსათბობად და არა ხალხისთვის. არ ვსაუბრობ მხოლოდ სიგარეტზე, ზოგადად ვლაპარაკობ. როცა გვჭირდება - ევროპა ვართ, როდესაც სოცილაურ ვალდებულებებზეა საუბარი - ღარიბი ქვეყანა ვართ.

„ეს ცალსახად უარყოფითად იმოქმედებს. ძალიან ბევრი რამ, რასაც „ოცნება აკეთებს სოციალური და ეკონომიკური მიმართულებით, სწორედ მის საწინააღმდეგოდ არის და ვერ გავიგე, რატომ აკეთებენ. არჩევნების წინ, ნაცვლად იმისა, რომ სოციალური ვალდებელებების კალათა გაზარდონ, ხელისუფლება პირიქით აკეთებს და ვერ ვხდები რატომ. ქუჩაში უნდათ გამოიყვანონ ხალხი? არჩევნების წაგება უნდათ? - უთხრა „რეზონანსს ძაბირაძემ.

ცნობისათვის, ფინანსთა მინისტრი სიგარეტის ფასის ზრდას აანონსებს. ვანო მაჭავარიანის თქმით, საქართველოსა და ევროკავშირში ფასები თანაბარი უნდა იყოს.

ევროკავშირში სიგარეტის ფასები 5 ევროდან იწყება, რაც იმას ნიშნავს, რომ საქართველოში სიგარეტი საშუალოდ მინიმუმ 15 ლარი ეღირება.

გაზეთი რეზონანსი