საზოგადოება

„სითი ინსტიტუტი“ გენგეგმის საბოლოო პროექტს მერიას თვე-ნახევარში გადაუგზავნის

ქალაქ თბილისის მიწათსარგებლობის გენერალურ გეგმაზე მომუშავე „სითი ინსტიტუტმა“ თბილისის მერიას დოკუმენტის წარდგენის ვადა შეუთანხმა. პროექტის დასახვეწად და ხარვეზების გამოსასწორებლად კომპანიამ თვე-ნახევარი მოითხოვა.

„ბუნებრივია, დავუკავშირდით თბილისის მერიას, ვაცნობეთ პოზიცია. საკითხი შეთანხმებულია ქალაქის მერთან და ეს ვადა განისაზღვრა თვე-ნახევრით. ჩვენ, ბუნებრივია, შეგვეძლო უფრო ნაკლებ დროშიც ჩავტეულიყავით, თუმცა აქ გასათვალისწინებელია, რომ, როგორც ჩანს, ჩვენი უცხოელი პარტნიორების გარკვეული ჩართულობაც იქნება საჭირო, მათთან კონსულტაციებიც. აგრეთვე, ძალიან მნიშვნელოვანია ერთი გარემოება, რომ ჩვენ აუცილებლად დაგვჭირდება ძალიან ინტენსიური ურთოერთობა ქალაქის სამსახურებთან, სწორედ ამიტომ ავიღეთ ეს ვადა, რომელიც მისაღებია როგორც მერიისთვის, ასევე ჩვენთვის“, -თქვა „სითი ინსტიტუტის“ გენერალურმა დირექტორმა მამუკა სალუქვაძემ.

„სითი ინსტიტუტმა“ კონსულტაციები ვადებთან დაკავშირებით უცხოელ პარტნიორებთან გუშინ გამართა.

გუშინ დედაქალაქის მერმა კახა კალაძემ უარი განაცხადა „სითი ინსტიტუტის“ მიერ შემუშავებულ მიწათსარგებლობის გენგეგმაზე, თუმცა დოკუმენტის დასახვეწად გონივრული ვადა მისცა.

ანა მებურიშვილი