საზოგადოება
სპორტსმენების არჩევანია, ვინ გააგრძელებს და ვინ არა ვარჯიშს - ძიუდოს ფედერაციის პრეზიდენტი
ძიუდოს ფედერაციის პრეზიდენტის, დავით ქევხიშვილის განცხადებით, ნაკრების ახალ მწვრთნელზე ფიქრი ადეკვატურია, მიუხედავად იმისა, რომ ძიუდოისტთა ნაწილი მისი გადადგომის მოთხოვნით არ ვარჯიშობს.
„ადეკვატურია ახალ მწვრთნელზე ფიქრი, რადგანაც ჩვენ გვაქვს საქმე. ჩვენ საქმეს გავაკეთებთ ბოლომდე.
რა თქმა უნდა, ნაკრები იქნება. მე არაერთხელ განვაცხადე, რომ მანიპულირება ყველას სახელით არ შეიძლება. დღევანდელ ნაკრებში არიან და იქნებიან ის სპორტსმენები, რომლებიც წავლენ ტურნირებზე და თქვენ უახლოეს პერიოდში ნახავთ ამას“, - განაცხადა ქევხიშვილმა ძიუდოს ფედერაციის აღმასრულებელ კომიტეტის სხდომის დასრულების შემდეგ.
კითხვაზე, იქნებიან თუ არა ნაკრების წევრები ის სპორტსმენები, ვინც მის გადადგომას მოითხოვენ, ქევხიშვილმა უპასუხა, რომ ეს მათი არჩევანია.
„ჩვენ მაქსიმალურად ღია ვართ ნებისმიერი დიალოგისთვის. მე არაერთხელ მითქვამს, რომ საკითხს ნუ უყურებთ სიმრავლით, საკითხს შეხედეთ სიმართლით. იყო რეკომენდაციები სამინისტროსგან და ყველამ ვნახეთ, რომ სამინისტრო სპორტსმენების პოზიციებს არ იზიარებს. რასაც ისინი ამბობენ, სიმართლე რომ ყოფილიყო, მე აქამდე აქ არ ვიქნებოდი. მე ვაკეთებ ჩემს საქმეს სპორტსმენებისთვის, რომელთაც ძალიან მალე ნახავთ. სპორტსმენების არჩევანია, ვინ გააგრძელებს და ვინ არა ვარჯიშს.
ფედერაციის კარი არავისთვისაა დაკეტილი მიუხედავად არაერთი არასწორი და აგრესიული ქმედებისა“, -თქვა ძიუდოს ფედერაციის პრეზიდენტმა.
აღმასკომის სხდომა პროტესტის ნიშნად დატოვა სპორტისა და ახალგაზრდული საქმეთა საპარლამენტო კომიტეტის თავმჯდომარის პირველმა მოადგილემ შოთა ხაბარელმა. დეპუტატმა განაცხადა, რომ მისთვის გაუგებარია, რატომ განიხილავდა აღმასკომი მწვრთნელის შერჩევის საკითხს და არა ქუჩაში გამოსული ძიუდოისტების პრობლემებს. ხაბარელის განმარტებით, მისთვის გაურკვეველია, რისთვის ირჩევენ მწვრთნელს, თუკი სპორტსმენები ძიუდოს ფედერაციის პრეზიდენტის, დავით ქევხიშვილის გადადგომის მოთხოვნით არ ვარჯიშობენ.
დღეს აღმასრულებელი კომიტეტის სხდომაზე ახალი სამწვრთნელო შტაბის საკითხზე მსჯელობდნენ. სხდომაზე ძიუდოისტები პროტესტის მიზეზები არ განიხილებოდა.
პარალელურად ძიუდოისტები პროტესტს განაგრძობენ. ისინი ძიუდოს ფედერაციის გადადგომის მოთხოვნით არ ვარჯიშობენ და ელოდებიან ბიძინა ივანიშვილის პასუხს მათ ერთობლივ მიმართვაზე.