კომენტარი

სტრასბურგის სასამართლო ვერ გააუქმებს ეროვნული სასამართლოს გადაწყვეტილებას - სოზარ სუბარი

ლტოლვილთა და განსახლების მინისტრმა, სოზარ სუბარმა რუსთავი 2-ის საქმესთან დაკავშირებით განმარტება გააკეთა და აღნიშნა, რომ სტასბურგის სასამართლოს ეროვნული სასამართლოს გადაწვეტილების გაუქმება არ შეუძლია.

,,საქართველოში არის სამი ინსტანცია. მესამე ინსტანციის სასამართლოს გადაწყვეტილება არის საბოლოო. მისი ზემდგომი ინსტაცია არ არსებობს, მაგრამ ეს გადაწყვეტილება დღეს შეჩერებულია სწორედ იმიტომ, რომ ჩვენ ვაღიარებთ სტრასბურგის სასამართლოს იურისდიქციას.

სტრასბურგის სასამართლო ვერ გააუქმებს ეროვნული სასამართლოს გადაწყვეტილებას, თუმცა მას აქვს უფლება, მოგთხოვოს თავიდან მოხდეს სასამართლო განხილვა, თუ ჩაითვლება, რომ სამართლიანი სასამართლოს უფლება არის დარღვეული. თუ ასე მოხდება, ბუნებრივია, ამ შემთხვევაში, ქართული სასამართლოები განიხილავენ ამ საქმეს თავიდან. ასე რომ, ერთი წუთით არ დგას ეჭვქვეშ სტრასბურგის სასამართლოს გადაწყვეტილების აღსრულების საკითხი. ამას არ განიხილავს არავინ საქართველოში’’, - განაცხადა სოზარ სუბარმა.

ნინო ექვთიმიშვილი