საზოგადოება
სურსათის ეროვნული სააგენტო თბილისში აზიური ფაროსანას შესაძლო გამოჩენას სწავლობს
თბილისელები შიშობენ, რომ აზიურმა ფაროსანამ, რომელსაც რამდენიმე თვეა დასავლეთ საქართველოში ებრძვიან, დედაქალქშიც ჩამოაღწია.
მწერი, რომელიც ძალიან ჰგავს აზიურ ფაროსნას, ვაკის პარკში შენიშნეს.
თბილისში შიშობენ, რომ დასავლეთ საქართველოს მსგავსად, მწერი საცხოვრებელ სახლებშიც შეაღწევს.
ვაკის პარკში დღეს იმყოფებოდნენ სურსათის ეროვნული სააგენტოს წარმომადგენლები.
როგორც სურსათის უვნებლობის სამსახურის უფროსის მოადგილემ ზურაბ ლიპარტიამ განაცხადა, ამ ეტაპზე გადაჭრით იმის თქმა, რომ ეს ნამდვილად აზიური ფაროსანაა რთულია.
მისი თქმით, ჩატარდება ლაბორატორიული კვლევა და მწერის სახეობის განსაზღვრის შემდეგ გატარდება შესაბამისი ზომები.
„საქართველოში 24 სახეობის ანალოგიური მწერია, რომელიც ძალიან ჰგავს ფაროსანას, თუმცა ამ სახეობებს თავისი ბუნებრივი მტრები ჰყავს ჩვენს ქვეყანაში და ის რეგულირდება, ზიანს და ზარალს არ აყენებენ. ამ ახალ სახეობას კი, რომელიც შემოსულია სულ რამდენიმე წელია საქართველოში, ვინაიდან ბუნებრივი მტრები არ ჰყავს, ის სასოფლო-სამეურნეო კულტურებს აზიანებს.
დღეს ჩამოვკიდეთ ფერომონი ვაკის პარკში, რომელიც არის სპეციპიკური ამ სახეობის მიმართ. მას მოთავსებულ მწერებს ჩაუტარდებათ ლაბორატორიული ანალიზი, რომლის შედეგადაც დავასკვნით ეს ის სახეობაა, რომელსაც ვეძებთ, თუ არა ,“ - განაცხადა ლიპარტიამ.
ნინო ექვთიმიშვილი