საზოგადოება

სვანეთში მდინარე ნესკრას ადიდების ერთ-ერთი მიზეზი ნამდვილად იყო გაჩეხილი ტყეები - ნინო ჩხობაძე

მწვანეთა მოძრაობა „დედამიწის მეგობრების“ თანათავმჯდომარის, ნინო ჩხობაძის განცხადებით, სვანეთში მდინარე ნესკრას ადიდების ერთ-ერთი მიზეზი ნამდვილად იყო გაჩეხილი ტყეები.

როგორც მან დღევანდელ პრესკონფერენციაზე განაცხადა, დასახლებულ პუნქტში წყალი რომ შევიდა ნიშნავდა იმას, რომ ტყემ ვერ შეაჩერა წყლის ნაკადი.

მისივე თქმით, მთაში უნდა აიკრძალოს პირწმინდა ჭრა, რადგან იქ აღმოცენების ნაკლები უნარი აქვს ტყეს, ვიდრე ბარში. ეს საჭიროა იმისთვის, რომ ავირიდოთ თავიდან ღვარცოფები.

როგორც ნინო ჩხობაძემ განაცხადა, ადიდებულმა მდინარე ნესკრამ მოჭრილი მორები ჩამოიტანა, რაც იმას მოწმობს, რომ რეგიონში ტყის უკონტროლო და მასშტაბური ჭრა მიდის.

მისი თქმით, საქართველოში ტყეების პირველი ფუნქცია არის დაცვითი, ის არის მდინარის ნაპირების გამაგრების საშუალება, სადაც კი მოიჭრა ხეები იქ მეწყერი განვითარდა.

”დავივიწყოთ ტყე, როგორც რესურსი და მივიღოთ ის დაცვის ფუნქციით. მაქსიმალურად უნდა შემცირდეს ტყის მოჭრა მთიან რეგიონებში, მიუხედავად იმისა, რომ არ ვარ მომხრე ძალოვანი სისტემების გამოყენების, რაღაც გასაკეთებელია და მოსაწერიგებელი რომ არის, ეს ფაქტია. იგივე ხის ჭრასთან დაკავშირებით. ძალიან ბევრ ადამიანს იქ ლეგალური ლიცენზიები აქვთ. ბოლო 2-3- წლის განმავლობაში გაცემული ნებართვები უნდა გადაიხედოს, სად ვის მიეცა ტყის ჭრის უფლება”, – აცხადებს ჩხობაძე.