საზოგადოება

თბილისის საკრებულოს დეპუტატებს 35 მანქანა ემსახურება, ლონდონის საკრებულოს წევრებს კი არცერთი - „ფლანგვის დეტექტორი“

არასამთავრობო ორგანიზაცია „მმართველობითი მონიტორინგის ცენტრის“ მედიაპროექტის, „ფლანგვის დეტექტორის“ მონაცემებით, თბილისის საკრებულოს დეპუტატებს 35 მანქანა ემსახურება მაშინ, როცა ლონდონის წარმომადგენლობითი ორგანოს (Greater London Authority )წევრებს - არცერთი.

როგორც „ფლანგვის დეტექტორის“ ფეისბუკის გვერდზეა აღნიშნული, ლონდონის საკრებულოს წევრები საჯარო ტრანსპორტით სარგებლობენ.

„დიდი ბრიტანეთის დედაქალაქის საკრებულოდან მიღებული წერილიდან ირკვევა, რომ ადმინისტრაციული ორგანოს წევრები და თანამშრომლები სამსახურეობრივი მანქანებით, ან სხვა რაიმე ტიპის დამატებითი ბენეფიტებით სახელმწიფოსგან არ სარგებლობენ. ასევე ხაზგასმითაა ნათქვამი, რომ იშვიათი გამონაკლისის გარდა, ლონდონის მერი და კოლეგიის სხვა წევრები საჯარო ტრანსპორტით გადაადგილდებიან“, - წერია „ფლანგვის დეტექტორის“ პოსტში.

„ფლანგვის დეტექტორის“ ინფორმაციით, 2016 წელს თბილისის საკრებულოს ბალანსზე არსებული მანქანების შენახვა ბიუჯეტს 104 396 ლარი დაუჯდა.

იმავე პოსტში ნათქვამია, რომ ლონდონის გზის მოცულობა 14 794 კმ-ს შეადგენს, ხოლო მთელი საქართველოს ქალაქებისა და სოფლის გზა 13 446 კმ-ს მოიცავს ( 2015 წლის საავტომობილო გზების დეპარტამენტის ინფორმაციით).

როგორც ფეისბუკის პოსტში წერია, გამოყენებულია თბილისის საკრებულოდან და ლონდონის წარმომადგენლობითი ორგანოდან მიღებული ინფორმაცია.

ანა მებურიშვილი