საზოგადოება
„თბილისობა 2017“ 7-8 ოქტომბერს გაიმართება
„თბილისობა 2017“ 7-8 ოქტომბერს გაიმართება, რომლის ფარგლებშიც მასშტაბური ღონისძიებებია დაგეგმილი.
ამის შესახებ თბილისის მერმა დავით ნარმანიამ დედაქალაქის მთავრობის სხდომაზე განაცხადა.
მისი თქმით, წელს თბილისობის მთავარი ლოკაციები „ახალი ტფილისი“, რიყე და ლეღვთახევი იქნება.
„თბილისობა 2017“-ის ფარგლებში წელს მასშტაბური ღონისძიებები გაიმართება. მოგეხსენებათ, თბილისობა წელს 7-8 ოქტომბერს გაიმართება. დღესასწაულთან დაკავშირებით, თბილისის მერიაში შექმნილია დედაქალაქის მთავრობის წევრებისგან დაკომპლექტებული კომისია, რომელიც ღონისძიების სრულყოფილად და შეუფერხებლად ჩატარებას უზრუნველყოფს. დღესასწაული წელსაც მასშტაბური და მრავალფეროვანი იქნება და იგი მთელ ქალაქს მოიცავს“,- აღნიშნა დავით ნარმანიამ.
მისი თქმით, „თბილისობა 2017"-ის ფარგლებში, მოეწყობა სხვადასხვა კულტურული და სპორტული ღონისძიება, საბავშვო/გასართობი და შემეცნებითი აქტივობები, კულინარიული გამოფენა-გაყიდვები, სასოფლო-სამეურნეო ბაზრობები და სხვა.
მონიკა დავლიანიძე