პოლიტიკა
თბილისში, იუსტიციის სახლთან მიმდინარე აქციის მონაწილეები შენობაში შეჭრა სცადეს - ისინი საკონსტიტუციო სასამართლოს გადაწყვეტილებას აპროტესტებენ
თბილისში, იუსტიციის სახლთან სასოფლო-სამეურნეო დანიშნულების მიწების უცხოელებზე გაყიდვის წინააღმდეგ „ქართული მარშის“ ორგანიზებით აქცია იმართება.
აქციის მონაწილეებმა შენობაში შესვლა სცადეს, თუმცა უშედეგოდ. დაკეტილია იუსტიციის სახლის ორივე შესასვლელი, რის გამო იუსტიციის სახლში მოქალაქეები შესვლას ვერ ახერხებენ.
შეკრებილები აპროტესტებენ საკონსტიტუციო სასამართლოს გადაწყვეტილებას, რომელმაც არაკონსტიტუციურად ცნო სასოფლო-სამეურნეო დანიშნულების მიწებზე დაწესებული მორატორიუმი. აქციის მონაწილეები ამ გადაწყვეტილებას „ანტიქართულს“ უწოდებენ.
აქციის მონაწილეები ითხოვენ, იუსტიციის სახლში რამდენიმე ადამიანი შეუშვან და დაიწყოს მოლაპარაკებები, რათა შეჩერდეს ეს პროცესი, ვიდრე კანონი ამოქმედდება. ისინი უშუალოდ იუსტიციის მინისტრ თეა წულუკიანთან შეხვედრას ითხოვენ, რათა მიმართოს მას, არ დაუშვას მიწების უცხოელებზე გასხვისება.
„ქართული მარშის“ გარდა, აქციაზე სხვადასხვა პოლიტიკური პარტიის წარმომადგენლები არიან შეკრებილი.
ადგილზე მობილიზებულია საპატრულო პოლიცია. იუსტიციის სახლთან შეკრებილების განცხადებით, იმ შემთხვევაში, თუ მათი მოთხოვნები არ დაკმაყოფილდება, პერმანენტულ აქციებს გამართავენ.
პარასკევს საკონსტიტუციო სასამართლომ სასოფლო-სამეურნეო დანიშნულების მიწების უცხოეთის მოქალაქეებზე გასხვისების მორატორიუმი არაკონსტიტუციურად ცნო, რის გამო ის ძალადაკარგულად გამოცხადდა, თუმცა შეზღუდვები მხოლოდ 16 დეკემბრამდე მოიხსნა. საქმე ისაა, რომ პრეზიდენტის ინაუგურაციის შემდეგ ახალი კონსტიტუცია ამოქმედდება, რომელიც სასოფლო-სამეურნეო დანიშნულების მიწების უცხოეთის მოქალაქეებზე გასხვისების შესახებ შეზღუდვებს კვლავ აწესებს.