საზოგადოება

თბილისში მსოფლიო ბალეტის სუპერვარსკვლავი იცეკვებს

სოსო ლაღიძის სახელობის ხელოვნების საერთაშორისო ფესტივალი „თბილისი რიტმი“ გრძელდება. მისი მომდევნო სტუმარი მსოფლიო ბალეტის სუპერვარსკვლავი ნატალია ოსიპოვა იქნება. ის საქართველოს პირველად ესტუმრება.

როგორც თბილისში, სასტუმრო „თბილისი მარიოტში“ გამართულ პრესკონფერენციაზე ფესტივალის დამფუძნებელმა და ხელმძღვანელმა ანი ლაღიძემ განაცხადა, ოსიპოვა თანამედროვეობის ერთ-ერთ უდიდეს ბალერინად არის აღიარებული. იგი ლონდონის სამეფო ბალეტის წამყვანი სოლისტია.

„ნატალია ოსიპოვა 15 ივნისს გრიბოედოვის სახელობის თეატრში პუბლიკის წინაშე განსაცვიფრებელი საპრემიერო პროგრამით -- „ნატალია ოსიპოვა - ბუნების ძალა“ -- წარდგება. წარმოდგენა აერთიანებს კლასიკურ და თანამედროვე დადგმებს, რომლებიც ოსიპოვას, როგორც მოცეკვავის, მრავალფეროვნებსა და შემოქმედებით თავისუფლებას უსვამს ხაზს’, -- აღნიშნა ანი ლაღიძემ.

როგორც „თბილისი რიტმის“ საერთაშორისო დეპარტამენტის წარმომადგენელმა ნინო ბეგლარიშვილმა განაცხადა, ნატალია ოსიპოვას სულ 172 როლი აქვს შესრულებული. „ბუნების ძალაში“ მათგან საუკეთესოები გააერთიანა.

„იგი ისეთ მოცეკვავეებს განეკუთვნება, რომლებიც გაიძულებენ, უყურო“, -- შენიშნა ნინო ბეგლარიშვილმა.

მისივე ინფორმაციით, ბალეტის ვარსკვლავი თბილისში მსოფლიოს სხვადასხვა საბალეტო დასის წამყვან მოცეკვავეებთან ერთად ჩამოდის. ესენი არიან: ქორეოგრაფი და მოცეკვავე ჯეისონ კიტელბერგერი, ვენის ოპერის წამყვანი სოლისტი ვიქტორ კაიშეტა, ლონდონის ნაციონალური ბალეტიდან -- ფრანჩესკა ველიკუ და დენიელ მაკორმიკი, მარიინსკის თეატრის წამყვანი სოლისტი და პინა ბაუშის დასის მოწვეული არტისტი დარია პავლენკო და შაჰარ ბინიამინის დასის მთავარი მოცეკვავე ჯოზეფ კუდრა.

ფესტივალ „თბილისი რიტმის“ 2025 წლის სეზონი 4 მაისს მარჯანიშვილის თეატრში ვირტუოზმა კუბელმა პიანისტმა რობერტო ფონსეკამ მუსიკალურ ჯგუფთან ერთად გახსნა. 9 სექტემბერს გრიბოედოვის თეატრში კი სეზონი ლეგენდარული ფრანგი აკორდეონისტის, რიშარ გალიანოს, საპრემიერო ალბომით დაიხურება.

ფესტივალი „თბილისი რიტმი“ საქართველოს კულტურის სამინისტროსა და თბილისის მერიის მხარდაჭერით ხორციელდება. მისი ორგანიზატორია საპროდიუსერო კომპანია „თაგის არტი“.