პოლიტიკა

თეა წულუკიანი შალვა ნათელაშვილისგან 2 ლარს მოითხოვს

საქალაქო სასამართლოში იუსტიციის მინისტრის, თეა წულუკიანის სარჩელის განხილვა დასრულდა.

წულუკიანი „ლეიბორისტული პარტიის“ ლიდერს, შალვა ნათელაშვილს ცილისმწამებლური განცხადებების გამო სასამართლოში უჩივის.

იუსტიციის მინისტრი, ოპოზიციური პარტიის ლიდერისგან კომპენსაციის სახით, სიმბოლურად 2 ლარს მოითხოვს.

საქმე ეხება შალვა ნათელაშვილის განცხადებას, რომლის მიხედვით, „ლეიბორისტების“ ლიდერი ამბობდა, რომ თეა წულუკიანმა ბინა სტრასბურგში, ბიძინა ივანიშვილის ფინანსური მხარდაჭერით შეიძინა.

პროცესს დღეს თავად შალვა ნათელაშვილიც დაესწრო.

„იმისთვის, რომ ადამიანმა და მინისტრმა გაასაჩივროს პოლიტიკური ღირსების და პატივის შელახვა, მას ასეთი ღირსება და პატივი უნდა ჰქონდეს... სასამართლოს იმედი ვის შეიძლება ჰქონდეს, რას ლაპარაკობთ. მაგრამ, ძალიან კარგია ეს ამ კორუმპირებული მინისტრების მხილებისთვის, მათი რეალური სახის წარმოსაჩენად, კიდევ ერთხელ საზოგადების და მსოფლიო თანამეგობრობის თვალში და ეს ყველაფერი ერთობლიობაში ძალიან მალე დაამთავრებს ამ სამარცხვინო, კორუმპირებულ რეჟიმს,“ - განაცხადა შალვა ნათელაშვილმა.