საზოგადოება

წელს მცირე სკოლებიდან მე-7, მე-8 და მე-9 კლასელები საზაფხულო ბანაკებში დაისვენებენ

წელს მცირე სკოლებიდან მე-7, მე-8 და მე-9 კლასელები, სულ 11 000 ბავშვი საზაფხულო ბანაკებში დაისვენებს.

შესაბამისი ინფორმაცია მთავრობის წევრებს ვიცეპრემიერმა, განათლებისა და მეცნიერების მინისტრმა ალექსანდრე ჯეჯელავამ მიაწოდა.

როგორც მთავრობის დღევანდელ სხდომაზე კვირიკაშვილმა აღნიშნა, წელს მნიშვნელოვნად გაიზარდა ბავშვებისთვის შესაძლებლობა, რომ საზაფხულო ბანაკებში დაისვენონ.

თავის მხრივ, როგორც ალექსანდრე ჯეჯელავამ აღნიშნა, ეს ბავშვები არიან მცირე სკოლებიდან, რაშიც სოფლის და ქალაქის მცირე სკოლები იგულისხმება.

„ეს არის ის გარემო, საიდანაც ყველაზე ნაკლები შანსი აქვთ ბავშვებს, რომ ბანაკებში მოხვდნენ და დასასვენებლად წავიდნენ. ერთი კვირის განმავლობაში 7 ბანაკში დაისვენებენ. ეს მხოლოდ დასვენება არ არის, ყველა ბანაკი შემეცნებითია. გვაქვს ეკობანაკი, გვაქვს თავდაცვის სამინისტროსთან ერთად ერთობლივი ბანაკი, პროფესიულ სასწავლებელთან ერთობლივი ბანაკი.

იმედი გაქვს, რომ მომავალში ეს დაფარავს მთელ საქართველოს მცირე სკოლებს. კვებას, ტრანსპორტირებას - ყველაფერს სახელმწიფო უზრუნველყოფს. ძალიან დიდი მნიშვნელობა აქვს ამას ამ ბავშვების უნარების ჩამოყალიბებისთვის. ჩვენ გვინდა, რომ მომავალ წლებში ეს პროცესი გაიზარდოს და ფაქტობრივად, დავფაროთ, მცირე სკოლების მთელი ტერიტორია. წელს 11 000 ბავშვია, შედარებითვის შარშან სულ ბანაკებში 4 000 ბავშვი იყო“, - განაცხადა ჯეჯელავამ.

განათლებისა და მეცნიერების მინისტრმა ყველა სამინისტროს მხარდაჭერისთვის მადლობა გადაუხადა.

ნინო ექვთიმიშვილი