საზოგადოება
„ცენტრ-პოინტს“, „m2“-სა და დაზარალებულ მენაშენეებს შორის სამმხრივი შეხვედრა გაიმართება
კომპანია „ცენტრ-პოინტს“, „m2“-სა და დაზარალებულ მენაშენეებს შორის სამმხრივი შეხვედრა გაიმართება. აღნიშნული გადაწყვეტილებისადმი მივიდნენ „ცენტრ-პოინტის“ დაზარალებულების ნაწილისა და თბილისის პროკურორის მოადგილის, მერაბ ჯერანაშვილის დღევანდელ შეხვედრაზე.
პროკურორის მოადგილესთან შეხვედრაზე კომპანია „ცენტრ-პოინტსა“ და კომპანია „m2“-ს შორის გაფორმებულ ხელშეკრულებაზე ისაუბრეს. სამმხრივ შეხვედრაზე კი, კომპანიის დაუსრულებელი ობიექტების საკითხს განიხილავენ.
დაზარალებულ მენაშენეთა ნაწილის თქმით, ისინი არანაირ დოკუმენტს არ მოაწერენ ხელს, თუ პროცესში მშენებელ კომპანიად კვლავ „ცენტრ-პოინტი“ იქნება წარმოდგენილი. ასევე, მათი განცხადებით, ყველა შეთანხმება, ოფიციალურად, დოკუმენტალურად უნდა იყოს გაფორმებული.
ასევე დაზარალებულები არ თანხმდებიან მსჯავრდებულ რუსუდან კერვალიშვილთან და მაია რჩეულიშვილთან საპროცესო შეთანხმების გაფორმებასა და გამოძიების შეწყვეტას მათი მოთხოვნების დაკმაყოფილებამდე.
„ცენტრ-პოინტსა“ და „m2“-ს შორის წინასწარი ხელშეკრულება გაფორმდა, რომლის მიხედვით, თუ ექვსი თვის ვადაში „ცენტრ-პოინტი“ გარკვეულ წინაპირობებს შეასრულებს, „m2“ „ცენტრ-პოინტის“ დაუსრულებელ კომპლექსებში სამშენებლო სამუშაოების წარმოებას დაიწყებს და 3 წლის ვადაში დაასრულებს. დაახლოებით 4 000 ოჯახი ბინებით 3 წლის განმავლობაში, ეტაპობრივად დაკმაყოფილდება.