კომენტარი

თუ მხოლოდ იმის შეცვლა უნდათ, რომ პრეზიდენტი არჩეული იქნას პარლამენტის მიერ, ეს მიუღებელი იქნება - თამარ კორძაია

რესპუბლიკური პარტიის წევრის, თამარ კორძაიას განცხადებით, საპარლამენტო უმრავლესობამ ჯერ უნდა თქვას, თუ რისი შეცვლა უნდათ კონსტიტუციაში, და მერე იფიქრონ კომისიის შექმნაზე.

ამასთან, როგორც კორძაიამ პრესკონფერენციაზე აღნიშნა, იგი საკონსტიტუციო კომისიას და კონსტიტუციური ცვლილებების იდეას ოპტიმისტურად არ უყურებს.

„მიუხედავად იმისა, თუ როგორი გახსნილობის სურვილიც არ უნდა გამოხატოს დღევანდელმა უმრავლესობამ, ეს პროცესი ღია არ იქნება, არ გამოვა მონაწილეობით, რადგან თუ ვინმეს უნდოდა მონაწილოებითი პროცესი, ამის საუკეთესო საშუალება არსებობდა წინა პარლამენტში. დღეს როდესაც აბსოლუტური უმრავლესობა აქვს ”ქართულ ოცნებას”პარლამენტში, მას ეს უბრალოდ არ სჭირდება, რასაც უნდა იმას გააკეთებს. ფასადური გამჭვირვალობა ნაკლებად მნიშვნელოვანია”, - განაცხადა კორძაიამ.

კორძაიას თქმით, რაც შეეხება პრეზიდენტის ინციატივას, რომ თავადაც მიიღოს კომისიის შექმნაში მონაწილეობა, კორძაიას თქმით, ეგ ნამდვილდ კარგია და თუ ის შეძლებს ამ პროცესის უფრო გაკეთილშობილებას, ამას მხოლოდ და მხოლოდ მიესალმება.

”კომისიის შექმნა კანონით დადგენილი ვალდებულებაა. კომისია უნდა შეიქმნას და უნდა იმუშაოს, მაგრამ ჯერ უნდა თქვან რისი შეცვლა უნდათ. თუ მხოლოდ იმის შეცვლა უნდათ, რომ პრეზიდენტი არჩეული იქნას პარლამენტის მიერ, ეს უკვე ცალსახად ნათელია, თუ რა უნდა დღევანდელ უმრავლესობას და ეს მიუღებელი იქნება როგორც რესპუბლიკელებისთვის, ისე სხვა ბევრი პოლიტიკური ძალისთვის. უნდა ვნახოთ, რისი შეცვლა უნდათ კონსტიტუციაში, რა არის ის ფუნდამენტური საკითხები, რისი შეცვლაც სასიცოცხლოდ მნიშვნელოვანია და ის არ უნდა იყოს მხოლოდ პრეზიდენტის არჩევის წესის ავტომატური ცვლილება”, - განმარტა თამარ კორძაიამ.

მონიკა დავლიანიძე