საზოგადოება

უხეშად, რომ ვთქვათ ე.წ. საგზაო შემთხვევების სეზონი იწყება - ეკა ლალიაშვილი

„საქართველოს ალიანსი უსაფრთხო გზებისთვის” გამგეობის თავმჯდომარის ეკა ლალიაშვილის განცხადებით, ზაფხულის პერიოდში სატრანსპორტო მოძრაობის კიდევ უფრო გააქტიურების ფონზე ავტოსაგზაო შემთხვევების ალბათობა იზრდება.

როგორც ლალიაშვილმა დღეს გამართულ პრესკონფერენციაზე განაცხადა, სახელმწიფოს მხრიდან უნდა იყოს შესაბამისი სამზადისი, რათა აღიკვეთოს მსგავსი შემთხვევები.

„წინა წელთან შედარებით ავტოავარიების მზარდი ტენდენცია შეინიშნება. ბოლო დროს გვესმის ავტოსაგზაო შემთხვევების შესახებ, რომლის მონაწილენი და დაზარალებულები არა ერთი და ორი არამედ ათეულობით ადამიანია. დამერწმუნეთ, მსგავსი შემთხვევა რომ ხდებოდეს პასუხისმგებლობის მქონე ქვეყანაში, რომელიც ზრუნავს საგზაო უსაფრთხოებაზე, აუცილებლად საგანგებო რეჟიმი გამოცხადდებოდა, მოხდებოდა საგანგებო კონტროლი თუ რა ხდება, პრემიერ-მინისტრის სპეციალური დავალება იქნებოდა გაცემული. ჩვენ შემთხვევაში თითქოს ეს არის ჩვეულებრივი ამბავი, ხდება საგზაო შემთხვევები ვიცით რომ აღიძვრება 267-ე მუხლით და სამწუხაროდ არ ვიცით შედეგები რას აკეთებს ხელისუფლება იმისათვის რომ მსგავსი შემთხვევა აღარ განმეორდეს. უხეშად, რომ ვთქვათ ე.წ. საგზაო შემთხვევების სეზონი იწყება, რადგან ზაფხულის პერიოდში სატრანსპორტო მოძრაობა უფრო ხშირდება და შესაბამისად ავტოსაგზაო შემთხვევების ალბათობაც დიდია. სახელმწიფოს მხრიდან უნდა იყოს შესაბამისი სამზადისი, რომ აღკვეთილი იქნას მსგავსი შემთხვევები“, -განაცხადა ეკა ლალიაშვილმა.