სამართალი

„უკვე იძულებული ვარ, დაცვით გადავადგილდე „- გიორგი გაბუნია დაკითხვაზე იმყოფებოდა

„რუსთავი 2"-ის წამყვანი გიორგი გაბუნია სამართლდამცველებმა სოციალურ ქსელში მისი მისამართით გავრცელებულ მუქარის შემცველ წერილებთან დაკავშირებით დაიბარეს.

მუქარის შემცველი წერილები სოცილურ ქსელში გუშინ გავრცელდა. ვინ არიან ეს ადამინები, ან ყავს თუ არა გამოძიებას ისინი იდენტიფიცირებული, ჯერჯერობით უცნობია.

„უკვე იძულებული ვარ, დაცვით გადავადგილდე. მუდმივ სტრესში მიწევს არა მარტო მუშაობა, არამედ უკვე უბრალოდ ქუჩაში მოძრაობაც კი. თუ აქამდე სამსახურში ვიყავი საფრთხის ქვეშ, ახლა უკვე პირდაპირ მიმანიშნებენ, რომ სახლშიც კი ვერ ვიგრძნობ უსაფრთხოდ თავს. ეს ძალიან მძიმეა. მე ყველანაირი თავისუფლების შეზღუდვას ძალიან მტკივნეულად აღვიქვამ, ახლა უბრალოდ არჩევანი არ მაქვს. მე ვალდებული ვარ, არც კი მკითხეს, ისე დამინიშნეს დაცვა და ახლაც დაცვა არის ჩემ გვერდით“- ამბობს გიორგი გაბუნია.

გაბუნიას თქმით, მუქარის შემცველი წერილები მას პირადად არ მისვლია, შეიძლება იმის გამოც, რომ , როგორც თვითონ ამბობს, სოციალურ ქსელში ეს ფუნქცია დაბლოკილი აქვს.

შეგახსენებთ, რომ "ქართულმა მარშმა" 19 მარტს ტელეკომპანია "რუსთავი 2"-თან საპროტესტო აქცია გამართა. აქციის მონაწილეები გიორგი გაბუნიას მიერ 17 მარტს ეთერში გასულ ხუმრობას აპროტესტებდნენ.

შსს-მ „რუსთავი 2“-თან მომხდარი ფაქტის გამო „ქართული მარშის“ 5 წევრი: მ.ა. ვ.ს. ი.დ. გ.ო. და ლ. ნ. საქართველოს სისხლის სამართლის კოდექსის 239-ე მუხლის მე-2 ნაწილის „ა“ ქვეპუნქტით დააკავა, რაც გულისხმობს ხულიგნობას, ჩადენილს წინასწარი შეთანხმებით ჯგუფის მიერ და ისჯება თავისუფლების აღკვეთით ვადით 2-დან 5 წლამდე.

20 მარტს შსს-მ ინციდენტის გამო „ქართული მარშის“ წევრი ლადო სადღობელაშვილიც დააკავა.

პროკურატურის განცხადებით, ჯერჯერობით ხუთი დაკავებულისთვის ბრალის წარდგენა არ იგეგმება, თუმცა არ არის გამორიხული,რომ ეს საგამოძიებო ღინისძიება დღის ბოლომდე ჩატარდეს.

პროკურატურაში აცხადებენ, რომ ახლა საგამოძიებო მოქმედებები მიმდინარეობს. მათი განცხადებით, რუსთავი 2-ის ჟურნალიტებზე განხორციელებული თავდასხმის ფაქტთან დაკავშირებით გამოძიება კიდევ ორი მუხლით მიმდინარეობს, ეს არის ძალადობისა და სხვისი ნივთის დაზინება დ არ არის გამორიცხული დაკავებულ ხუთ პირს ბრალი ამ მუხლებითაც დაუმძიმდეთ.

ცირა გურგენიძე