პოლიტიკა

უმრავლესობა სადისციპლინო წესებზე მუშაობს

პარლამენტის თავმჯდომარის, ირაკლი კობახიძის განცხადებით, მიმდინარეობს წესებზე მუშაობა, რასაც უმრავლესობის ფარგლებში განიხილავენ და რის საფუძველზეც გაგრძელდება მუშობა საპარლამენტო უმრავლესობაში.

„გაიწერება წესები, რომელიც უნდა იყოს დაცული თითოეული დეპუტატის მიერ. ეს არის ის წესები, რომლებსაც წესით დაწერა არც სჭირდებათ, თუმცა ჩვენ ვნახეთ, რომ ამ დღეების განმავლობაში ეს წესები არაერთხელ დაირღვა. თუ არ არის საკმარისი დაუწერელი წესები, ეს წესები უნდა დაწერო", - განაცხადა კობახიძემ.

კობახიძისვე თქმით, არსებობს რესურსები იმ დეპუტატებთან სათანამშრომლოდ, ვინც შეცდომები დაუშვა.

"რამდენიმე დეპუტატმა დაუშვა შეცდომა. ამ შეცდომებზე საუბარი მნიშვნელოვანია. საჭიროა ყველაფრის შეფასება. არის რესურსი ბევრ დეპუტატთან, მათ შორის მათთან ვინც დაუშვა შეცდომები, იმისთვის, რომ ძალიან მჭიდრო თანამშრომლობა გაგრძელდეს",- განაცხადა კობახიძემ.

ცირა გურგენიძე