პოლიტიკა

უმრავლესობის წარმომადგენლები ირმა ინაშვილს პასუხობენ

პარლამენტის თავმჯდომარე, ირაკლი კობახიძე "პატრიოტთა ალიანსის" ლიდერ ირმა ინაშვილს პასუხობს, რომელმაც შესაძლოა საკონსტიტუციო კომისია დატოვოს.

"ოპოზიციას საკონსტიტუციო კომისიის დატოვების კარგი გამოცდილება აქვს, ეს მათი გადასაწყვეტია,"- განაცხადა კობახიძემ.

თავის მხრივ, როგორც მმართველი გუნდის წევრმა, მამუკა მდინარაძემ განაცხადა, საკონსტიტუციო რეფორმა ბოლომდეა მისაყვანი და ეს პროცესი აუცილებლად გაგრძელდება.

"უკაცრავად, მაგრამ ირმას გასაგებია, რომ სჭირდება უფასო სარეკლამო დრო, საკუთარი თავის, საკუთარი პარტიის პიარი. ჩვენ მის დღის წესრიგს ვერ მოვერგებით. კონსტიტუციიური რეფორმა ბოლომდეა მისაყვანი, აქედან გამომდინარე, მივყვებით იმ დღის წესრიგს, რომელიც კანონით არის გათვალიწინებული და რომელიც უკეთესია იმისთვის, რომ რეალურად განვიხილოთ მათ შორის სამეცნიერო წრეებთან ის 4 ცვლილება, რომელიც დაანონსებულია და კონსტიტუციის პროექტშია,"- განაცხადა ფრაქცია "ქართული ოცნების" თავმჯდომარემ, მამუკა მდინარაძემ.

ცნობისათვის, საკონსტიტუციო ცვლილებების პროექტის საყოველთაო-სახალხო განხილვის საორგანიზაციო კომისიის შემადგენლობა პლენარულ სხდომაზე 83-ით არცერთის წინააღმდეგ 2 ნოემბერს დაამტკიცეს.

კომისიაში შევიდნენ: ირაკლი კობახიძე, თამარ ჩუგოშვილი, არჩილ თალაკვაძე, მამუკა მდინარაძე, სალომე ზურაბიშვილი, ირმა ინაშვილი, ვასილ გონაშვილი, თენგიზ შარმანაშვილი, ლაშა ტუღუში და თორნიკე ჭეიშვილი.

საკონსტიტუციო ცვლილებების საყოველთაო განხილვებს ევროპული საქართველო, ნაციონალური მოძრაობა და ლიდერთა საბჭოში შემავალი ოპოზიციური პარტიები ემიჯნებიან.

ნინო ექვთიმიშვილი