პოლიტიკა

უნდა შევიკრიბოთ პრეზიდენტის აქტის დასამტკიცებლად - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, საკანონმდებლო ორგანომ უნდა იმსჯელოს პრეზიდენტის აქტზე, რომელიც აუცილებლობის შემთხვევაში ბორჯომის ხეობაში სამხედრო ძალების გამოყენების ნებას აძლევს. ამის შესახებ პარლამენტის თავმჯდომარემ ბიუროს სხდომაზე ისაუბრა.

„როგორც მოგეხსენებათ, ხანძრის ლიკვიდაციისთვის საჭირო სამხედრო ძალების გამოყენება გახდა. შესაბამისი წარდგინებით პრემიერ-მინიტრმა პრეზიდენტს მიმართა, რომელმაც სამხედრო ძალების გამოყენების თაობაზე აქტი გამოსცა.

გუშინ, გორის მუნიციპალიტეტის ტერიტორიაზე, ხანძრის ლიკვიდაციაში სამხედრო ძალები უკვე ჩართული იყვნენ და ხანძრის ლიკვიდაციის მიზნით, დღეს სამხედრო ძალების გამოყენება შესაძლებელია სხვა არეალშიც. სესიაზე უნდა შევიკრიბოთ, რათა პრეზიდენტის აქტი კონსტიტუციისა და რეგლამენტის შესაბამისად დავამტკიცოთ“, - განაცხადა კობახიძემ.

დღეს პარლამენტის რიგგარეშე სხდომაზე კენჭისყრა გაიმართება პრეზიდენტის აქტზე, რომელიც სტიქიის ზონაში სამხედრო ძალების გამოყენებას ეხება. შესაბამისი წარდგინებით პრემიერ-მინისტრმა პრეზიდენტს გუშინ მიმართა.

ბორჯომის ხეობაში ხანძარი 20 აგვისტოს გაჩნდა. ამ ეტაპზე ცეცხლი ლოკალიზებულია და დარჩენილია რამდენიმე კერა.

ანა მებურიშვილი