პოლიტიკა

უნივერსიტეტი შეხვედრაზე გაკეთებულ ანტიდასავლურ განაცხადებებს ემიჯნება

თბილისის სახელმწიფო უნივერსიტეტის რექტორის მოადგილემ, მიხეილ ჩოხელმა განმარტება გააკეთა უნივერსიტეტში ჩატარებულ სამეცნიერო შეხვედრაზე „დასავლური საფრთხეები საქართველოში“.

ჩოხელის თქმით, შეხვედრის ორგანიზატორებმა თემა ისე შეცვალეს, რომ თსუ-ის ხელმძღვანელობა საქმის კურსში არ ჩააყენეს.

ჩოხელმა აღნიშნა, რომ უნივერსიტეტი შეხვედრაზე გაკეთებულ ანტიდასავლურ განაცხადებებს ემიჯნება.

„შეცვალეს თემა, შესაბამისად, მოატყუეს ფაკულტეტი და უნივერსიტეტი. ჩვენი უნივერსიტეტის არცერთი სტუდენტი, არცერთი პროფესორი, არცერთი თანამშრომელი ამ შეხვედრას არ ესწრებოდა. მინდა, ხაზგასმით აღვნიშნო, რომ თბილისის სახელმწიფო უნივერსიტეტი კატეგორიულად ემიჯნება იმ აბსურდულ განცხადებებს, რაც ამ ე.წ. სამეცნიერო შეხვედრაზე გაკეთდა. ჩვენი უნივერსიტეტი მუდამ იყო, არის და იქნება ევროპული ღირებულებების ერთგული“, - განაცხადა ჩოხელმა.

შეგახსენებთ, 30 მაისს თბილისის სახელმწიფო უნივერსიტეტში გაიმართა კონფერენცია თემაზე „დასავლური საფრთხეები საქართველოში“, რომლის ერთ-ერთი მონაწილე თავდაცვის სამინისტროს ყოფილი თანამშრომელი ტრისტან წითელაშვილი იყო. საინფორმაციო სააგენტო პატრიოტი tv-ის გავრცელებულ ვიდეოში წითელაშვილმა ამერიკის ელჩი, იან კელი დაადანაშაულა, რომ ის „საქართველოს შიდა საქმეებში“ ერევა და პანკისის ხეობაში, სირიიდან დაბრუნებულ ისლამური სახელმწიფოს ტერორისტებს შეხვდა.

ანა მებურიშვილი