უკან

პოლიტიკა

16 ოქტომბერი, 2017 16:00
font-size

უწყებათაშორისი კომისიის სხდომაზე დმანისის ინციდენტზე რეაგირების საკითხი განიხილეს

თავისუფალი და სამართლიანი არჩევნებისთვის უწყებათაშორისი კომისიის მორიგი სხდომა გაიმართა, რომელსაც კომისიის თავმჯდომარე, იუსტიციის მინისტრი თეა წულუკიანი უძღვებოდა.

იუსტიციის სამინისტროს ინფორმაციით, სხდომის დასაწყისში ღონისძიების მონაწილეებმა დმანისის ინციდენტზე რეაგირების შესახებ მოისმინეს. როგორც ცნობილია, უწყებათაშორისი კომისიის 9 ოქტომბრის სხდომაზე იუსტიციის მინისტრმა მთავარი პროკურორის მოადგილეს, რომელიც კომისიის წევრია, სთხოვა, პირად კონტროლზე აეყვანა გავრცელებული ინფორმაცია საარჩევნოდ მოსახლეობის მხარდაჭერისთვის დმანისში ადგილობრივთა „ყურანზე“ დაფიცებასთან დაკავშირებით. მთავარი პროკურორის მოადგილემ კომისიას დღეისათვის გამოძიების ხელთ არსებული მასალების შესახებ მიაწოდა ინფორმაცია. კერძოდ, მომჩივნის თქმით, მას შემდეგ, რაც უწყებათაშორისმა კომისიამ განიხილა მომხდარი ფაქტი და შესაბამისი რეკომენდაცია მიიღო, მსგავს შემთხვევებს ადგილი აღარ ჰქონია. იუსტიციის მინისტრის განცხადებით, აუცილებელია, გაირკვეს, ჰქონდა თუ არა ასეთ ფაქტებს ადგილი დმანისში. ამ მიზნით პროკურატურა აგრძელებს გამოძიებას და დღეისათვის 15-მდე პირი გამოიკითხა.

უწყებათაშორისმა კომისიამ პოლიტიკური პარტიებისა და არასამთავრობო ორგანიზაციების მიერ შემოტანილი განცხადებები განიხილა, რომლებიც შესაძლო ზეწოლის, ფიზიკური შეურაცხყოფის, ძალადობისა და სააგიტაციო მასალის დაზიანების − პლაკატების ჩამოხევის ან მასზე სხვა საარჩევნო სუბიექტის პლაკატის გადაკვრის ფაქტებს უკავშირდებოდა. როგორც სხდომაზე აღინიშნა, ყველა იმ საკითხს, რომლებითაც არასამთავრობო ორგანიზაციებმა და პოლიტიკურმა სუბიექტებმა უწყებათაშორის კომისიას მიმართეს, უკვე მოჰყვა რეაგირება; ისინი შს სამინისტროს, მთავარ პროკურატურას, რეგიონული განვითარებისა და ინფრასტრუქტურის სამინისტროს, აუდიტის სამსახურსა და ცესკო-ს გადაეგზავნა. ამ უწყებების წარმომადგენლებმა უწყებათაშორის კომისიას მიაწოდეს დეტალური ინფორმაცია შესაძლო ინციდენტებზე რეაგირების თაობაზე. როგორც უწყებათაშორისი კომისიის დღევანდელ სხდომაზე ითქვა, შესაძლო ფიზიკური ძალადობის 10 საქმეზეა დაწყებული გამოძიება.

გარდა კომისიის წევრების მიერ შემოტანილი განცხადებებისა, სხდომაზე ის შესაძლო დარღვევებიც განიხილეს, რომლებიც უწყებათაშორისმა კომისიამ მედიაში გავრცელებული მასალის მონიტორინგის ფარგლებში მოიპოვა. მედიაში გავრცელებული შესაძლო დარღვევების ფაქტებზე რეაგირება დაუყოვნებლივ ხდება და ისინი შესაბამის უწყებებს ეგზავნება. ამდენად, უწყებათაშორის კომისიას სამართლიანი და თავისუფალი არჩევნებისათვის საშუალება ჰქონდა, მათზე რეაგირების შესახებაც მიეღო ინფორმაცია.

სხდომას ესწრებოდნენ კომისიის წევრები − აღმასრულებელი ხელისუფლების, საარჩევნო პროცესში ჩართული პოლიტიკური პარტიებისა და ბლოკების, ადგილობრივი არასამთავრობო და საერთაშორისო ორგანიზაციების წარმომადგენლები.

უწყებათაშორისი კომისია თანამშრომლობს საარჩევნო პროცესში ჩართულ პოლიტიკურ პარტიებსა და ბლოკებთან, ადგილობრივ არასამთავრობო და საერთაშორისო ორგანიზაციებთან, დამკვირვებლებთან. სამუშაო პროცესში მონაწილეობენ კომისიის წევრები (საქართველოს შინაგან საქმეთა; საგარეო საქმეთა; ფინანსთა; თავდაცვის; რეგიონული განვითარებისა და ინფრასტრუქტურის; სასჯელაღსრულებისა და პრობაციის; განათლებისა და მეცნიერების; შრომის, ჯანმრთელობისა და სოციალური დაცვის მინისტრების მოადგილეები; აგრეთვე, მთავარი პროკურორისა და სახელმწიფო უსაფრთხოების სამსახურის უფროსის მოადგილეები; საქართველოს მთავრობის ადმინისტრაციის რეგიონებსა და ადგილობრივი თვითმმართველობის ორგანოებთან ურთიერთობების დეპარტამენტის უფროსი), კვალიფიციური საარჩევნო სუბიექტების, სხვა პოლიტიკური პარტიებისა და საარჩევნო ბლოკების, ადგილობრივი და საერთაშორისო დამკვირვებელი ორგანიზაციების წარმომადგენლები. თავისუფალი და სამართლიანი არჩევნებისთვის უწყებათაშორისი კომისია საქმიანობას ცესკო-ს მიერ არჩევნების საბოლოო შედეგების ოფიციალურად გამოქვეყნების დღიდან შეწყვეტს.

უწყებათაშორისი კომისია 2013 წლის საპრეზიდენტო, 2014 წლის ადგილობრივი და 2016 წლის საპარლამენტო არჩევნების პერიოდშიც ფუნქციონირებდა. კომისია შეიქმნა 2015 წლის შუალედური არჩევნებისთვისაც. ჯამში, სამართლიანი და თავისუფალი საარჩევნო გარემოს უზრუნველსაყოფად კომისიამ 48 რეკომენდაცია შეიმუშავა. უწყებათაშორისი კომისიის ეგიდით და მთავრობის გადაწყვეტილებით, პირველად 2016 წელს წინასაარჩევნო პერიოდში ძალადობის პრევენციისა და ძალადობის წინააღმდეგ ჩატარდა სპეციალური საინფორმაციო კამპანია (17 სექტემბერი - 30 ოქტომბერი), რომელშიც მონაწილეობა მიიღო საარჩევნო სუბიექტის 11-მა ლიდერმა; შეიქმნა ვიდეორგოლი, სადაც პოლიტიკოსები მხარდამჭერებს არჩევნების ძალადობისგან თავისუფალ გარემოში ჩატარებისაკენ მოუწოდებდნენ. ვიდეორგოლი 18 სექტემბრიდან 2 ოქტომბრამდე პერიოდში 967 620-მა მაყურებელმა, მინიმუმ, ერთხელ მაინც ნახა.

კომისია იუსტიციის მინისტრის 2017 წლის 30 ივნისის ბრძანებით (https://www.matsne.gov.ge/ka/document/view/3719758) შეიქმნა და მისი მიზანი 2017 წლის ადგილობრივი არჩევნების დროს საჯარო მოსამსახურეების მხრიდან საარჩევნო კანონმდებლობის დარღვევის პრევენცია, გამოვლენილ დარღვევებზე რეაგირება და ამ გზით თავისუფალი და სამართლიანი საარჩევნო გარემოს შექმნაა.

სახალხო დამცველი ევროსაბჭოს დელეგაციის წევრებს შეხვდა

22 ნოემბერი, 2017 , 15:40

2017 წლის 22 ნოემბერს სახალხო დამცველი უჩა ნანუაშვილი ევროსაბჭოს საპარლამენტო ასამბლეის მონიტორინგის კომიტეტის წევრებს კერსტინ ლუნდგრენს და ტიტუს კორლატინს, ევროსაბჭოს წარმომადგენელს ბას კლეინს და ევროსაბჭოს ოფისის ხელმძ

იციკ მოშე: შენს ქვეყანას ეხმარებოდე თუნდაც 1 დოლარით, ესაა მასთან დამაკავშირებელი დიდი ხიდი და ზრუნვის სიმბოლო

22 ნოემბერი, 2017 , 14:25

რუმინეთის შემდეგ, „ისრაელის სახლის“ კონცეფციის პრეზენტაციები აღმოსავლეთ ევროპის სხვა ქვეყნებში გაიმართება. ამასთან დაკავშირებით, ხვალ, 23 ნოემბერს „ისრაელის სახლის“ დამფუძნებელი და ხელმძღვანელი იც

გიორგი მარგველაშვილი საპრეზიდენტო არჩევნებზე, შესაძლოა პოლიტიკური გუნდით გამოვიდეს - გია ვოლსკი

22 ნოემბერი, 2017 , 14:10

პარლამენტის ვიცე-სპიკერი გია ვოლსკი მიიჩნევს, რომ პრეზიდენტი გიორგი მარგველაშვილი 2018 წლის საპრეზიდენტო არჩევნებზე პოლიტიკური გუნდით წარსდგება. ამის შესახებ ვოლსკიმ პრეზიდენტის მიერ გაკეთებული განცხადების კომენტირებისას

გირგვლიანის თემაზე სააკაშვილთან საუბარი არასდროს არ მქონია - დათა ახალაია

22 ნოემბერი, 2017 , 14:10

კონსტიტუციური უსაფრთხოების დეპარტამენტის ყოფილი უფროსის დათა ახალაიას თქმით, მას ექს-პრეზიდენტ მიხეილ სააკაშვილთან მოკლული სანდრო გირგვლიანის თემაზე არასდროს უსაუბრია. ამის შესახებ ახალაიამ სანდრო გირგვლიანის საქმეზე სას

სამწუხაროა, რომ ჩვენ მივდივართ ამ ეტაპისთვის სრული სვლით ერთპარტიული გადაწყვეტილებებისკენ - გიორგი აბაშიშვილი

22 ნოემბერი, 2017 , 10:20

გუშინ, ევროსაბჭოს საპარლამენტო ასამბლეის დელეგაციის წევრები პრეზიდენტის სასახლეში გიორგი მარგველაშვილს შეხვდნენ. როგორც შეხვედრის დასრულების შემდეგ პრეზიდენტის ადმინისტრაციის უფროსმა გიორგი აბაშიშვილმა ჟურნალისტებს განუც

გიორგი მარგველაშვილი პრეზიდენტის თანამდებობაზე ხელმეორედ კენჭისყრას არ გამორიცხავს

21 ნოემბერი, 2017 , 22:56

საქართველოს პრეზიდენტი გიორგი მარგველაშვილი პრეზიდენტის თანამდებობაზე ხელმეორედ კენჭისყრას არ გამორიცხავს. “არა, ბუნებრივია, არ გამოვრიცხავ“, - ასე უპასუხა საქართველოს პრეზიდენტმა გიორგი მარგველაშვილმა &bdquo