საზოგადოება
„ვარკეთილის“ მეტროში ჭერის ჩამოშლის გამო თბილისის მეტრო დროებით „ახმეტელის თეატრიდან“ „300 არაგველამდე“ იმოძრავებს
თბილისის სატრანსპორტო კომპანია მეტროსადგურ „ვარკეთილში“ დაკიდული ჭერის ჩამოშლის ფაქტს გამოეხმაურა. მისი ინფორმაციით, მომხდარის გამო თბილისის მეტრო დროებით „ახმეტელის თეატრიდან“ „300 არაგველამდე“ იმოძრავებს.
მეტროსადგურ „ვარკეთილში“ ჭერის ჩამოშლის შედეგად დაშავებულთა რიცხვი 11-მდე გაიზარდა, მათ შორისაა საპატრულო პოლიციის ერთ-ერთი თანამშრომელი.
დაშავებულები სამედიცინო დაწესებულებებში გადაიყვანეს.
ადგილზე მობილიზებული არიან სამაშველო სამსახურები.
მეტროსადგურ „ვარკეთილში“ კომპანია „ყვარელრემმშენმა“ სარეაბილიტაციო სამუშაოები 2017 წლის აგვისტოში დაასრულა, ხოლო სექტემბერში ახალგარემონტებული მეტროსადგური ექსპლუატაციაში შევიდა. თბილისის მერის, კახა კალაძის ინფორმაციით, ამავე კომპანიამ შეარემონტა „ახმეტელის“ მეტრო, რის გამოც ობიექტის შემოწმება დღესვე მოხდება.