პოლიტიკა

ვფიქრობ, ჩვენი მოქალაქეები წლის ბოლომდე მოახერხებენ ევროკავშირში უვიზოდ მიმოსვლას - დიმიტრი ცქიტიშვილი

,,ქართული ოცნება-დემოკრატიული საქართველოს“ წევრის დიმიტრი ცქიტიშვილის განცხადებით, ევროკავშირის საბჭოსადმი ევროპარლამენტის გუშინდელი მიმართვით, კიდევ უფრო დაჩქარდება საქართველოსთვის ვიზალიბერალიზაციის მინიჭების პროცესი და საქართველოს მოქალაქეები წლის ბოლომდე შეძლებენ ევროკავშირში უვიზოდ მიმოსვლას.

,,ძალიან მნიშვნელოვანია თავისთავად ეს ფაქტი, იქიდან გამომდინარე, რომ LIBE, ანუ სამოქალაქო თავისუფლების კომიტეტი ერთ-ერთი წამყვანია ამ თემის მიმართულებით. ამ განცხადებას ხელს აწერს როგორც კომიტეტის თავმჯდომარე, ასევე მომხსენებელი საქართველოსთან დაკავშირებულ საკითხებზე. ვფიქრობ, რომ ამ საკითხით კიდევ უფრო დაჩქარდება პროცესი და ჩვენი მოქალაქეები წლის ბოლომდე მოახერხებენ ევროკავშირში უვიზოდ მიმოსვლას“, - განაცხადა დიმიტრი ცქიტიშვილმა და აღნიშნა, რომ გუშინ გაკეთებული განცხადება კიდევ ერთი დასტურია იმისა, რომ ევროკავშირი ხედავს და აღიარებს საქართველოს მიერ ნაკისრი ვალდებულებების შესრულებას.

შეგახსენებთ, გუშინ ევროპარლამენტის სამოქალაქო თავისუფლებათა, მართლმსაჯულებისა და შინაგან საქმეთა კომიტეტმა (LIBE) ევროკავშირის საბჭოს თავმჯდომარე ქვეყანა სლოვაკეთს მიმართა - საქართველოსთვის ვიზალიბერალიზაციის დაწესების მიზნით მოლაპარაკებები რაც შეიძლება მალე, ნოემბრის დასაწყისში დაიწყოს.

მარი ნამგალაძე